पर्सा — पूर्वराष्ट्रपति विद्यादेवी भण्डारीले महिलाहरू समाजको नेतृत्व गर्न सक्षम भएको प्रमाणित गर्ने बेला आएको बताउनुभएको छ। वीरगन्जमा उद्योग वाणिज्य संघद्वारा आयोजित ‘नारी: शक्ति, समर्पण र सम्मान’ महिला सम्मेलन–२०८२ को उद्घाटन समारोहलाई सम्बोधन गर्दै भण्डारीले महिलाको योगदानले अझै पनि अपेक्षित सम्मान नपाएको भन्दै अब नेतृत्व, उद्यम र समाजपरिवर्तनमा महिलालाई सक्षम बनाउनुपर्ने बताउनुभएको छ।

परिवार निर्माणदेखि शिक्षा, स्वास्थ्य, व्यवसाय र सामाजिक रुपान्तरणसम्म महिलाको अग्रणी भूमिका रहेको बताउँदै महिलाको उद्यमशीलता व्यक्तिगत सफलता मात्र नभई राष्ट्रिय अर्थतन्त्र मजबुत बनाउन महिलाहरुको योगदान अतुलनिय रहेको भण्डारीले बताउनुभएको छ।

भण्डारीले महिला उद्यमीलाई सम्मान र प्रोत्साहन गर्नुपर्ने, लैङ्गिक असमानता तोड्दै भावी पुस्तालाई प्रेरित गर्नुपर्ने भन्दै, प्राकृतिक स्रोत, जनशक्ति र सांस्कृतिक विविधताको विवेकपूर्ण उपयोग गरेर आत्मनिर्भर अर्थतन्त्र बनाउन सकिने बताउनुभयो।

व्यापार घाटा कम गर्न आयात प्रतिस्थापन नीति, कृषि, जडीबुटी, आयुर्वेद, साना उद्योग, पर्यटन, ऊर्जा र सूचना प्रविधिमा लगानी गर्नुपर्ने उनको भनाइ थियो।

चुरे दोहनका कारण तराईमा बाढी, जमिन कटान र मरुभूमीकरण बढेको उल्लेख गर्दै उनले कृषि र जनजीवनमा त्यसले गम्भीर असर पारेको बताइन्। उखु किसानलाई उचित मूल्य र भुक्तानी नपाएको, साहु–महाजन र सहकारी घोटालाबाट जनताले समस्या भोगिरहेको भन्दै उनले कडाइका साथ नियमन, पारदर्शिता र पीडितलाई क्षतिपूर्ति उपलब्ध गराउन सरकारलाई आग्रह समेत गर्नुभएको छ।