काठमाडौँ — प्रतिनिधिसभाले शुक्रबार भूमि सम्बन्धी केही नेपाल ऐन संशोधन गर्ने विधेयक, २०८२ लाई बहुमतले पारित गरेको छ। सभामुख देवराज घिमिरेले विधेयक पारित भएको घोषणा गरेका हुन्।

भूमि व्यवस्था, सहकारी तथा गरिबी निवारणमन्त्री बलराम अधिकारीले प्रस्तुत गरेको प्रस्ताव बहुमतले पारित भएको हो। मन्त्री अधिकारीले विधेयकको उद्देश्य भूमिहीन दलित, सुकुम्बासी र अव्यवस्थित बसोबासीलाई व्यवस्थित रूपमा बसोबास गर्न जग्गा उपलब्ध गराउनु रहेको बताए। उनका अनुसार जोखिमयुक्त क्षेत्रमा बसोबास गर्नेहरूलाई पालिकासँग समन्वय गरी एकीकृत बस्तीमा पुनर्स्थापना गर्ने व्यवस्था गरिएको छ।

तर, केही सांसदहरूले विधेयकको आलोचना गरेका छन्। जसपाका राजकिशोर यादवले अपेक्षित वर्गले लाभ नपाउने दाबी गरे भने सांसद प्रकाश अधिकारीले विधेयकमा संवैधानिक विश्लेषण नभएको र भूमाफियालाई फाइदा पुग्नेगरी आएको आरोप लगाएका छन् । माओवादी प्रमुख सचेतक हितराज पाण्डेले पनि विधेयकका कतिपय व्यवस्था व्यवहारिक नभएको बताएका छन् ।