वासिङ्टन – अमेरिकाले युक्रेन युद्धसम्बन्धी वार्तामा कब्जा गरिएको रुसी सम्पत्तिलाई दबाबका रूपमा प्रयोग गर्ने योजना बनाएको छ, तर तिनलाई तत्काल किभलाई हस्तान्तरण नगर्ने स्पष्ट पारेको छ। अमेरिकी कोष सचिव स्कट बेस्सेन्टले पत्रकारहरूसँग सो कुरा सार्वजनिक गरेका हुन्।

सन् २०२२ देखि पश्चिमी वित्तीय संस्थानहरूमा रोकिएका करिब ३०० अर्ब अमेरिकी डलर बराबरका रुसी सम्पत्तिबारे बोल्दै बेस्सेन्टले भने, ती सम्पत्ति वार्ताको हिस्सा हुन्। उनले तत्काल ति सम्पति जफत गर्नु उचित नभएको बताउँदै, वार्ताको नतिजा अनुसार ती रकम युक्रेनको पुनर्निर्माणमा प्रयोग हुन सक्ने संकेत दिएका छन् ।

यधपी, रुसको उक्त कब्जा गरिएको सम्पत्ति बारे पश्चिमी राष्ट्रहरूबीच मतभेद देखिएको छ। युक्रेनले उक्त रकम छिट्टै हस्तान्तरणको माग गर्दै आएको छ भने केही युरोपेली नेताहरू र विज्ञहरूले यस्तो कदमले अन्तर्राष्ट्रिय कानुन उल्लंघन गर्ने, लगानीकर्ताको विश्वास घटाउने र वित्तीय बजार अस्थिर बनाउने चेतावनी दिएका छन्।

हालका लागि युरोपेली संघले रोकिएका सम्पत्तिबाट प्राप्त नाफा र ब्याजलाई मात्र युक्रेनतर्फ पठाउने निर्णय गरेको छ, जसबाट वार्षिक करिब ३ अर्ब डलर जुट्ने अनुमान गरिएको छ। अमेरिकी कांग्रेसले पनि सरकारलाई रुसी सम्पत्ति कब्जा गर्ने कानुनी अधिकार दिएको भए पनि, वाशिङ्टनले कानुनी र वित्तीय जोखिमका कारण त्यो कदम नचालेको बताइएको छ । यसको सट्टा, अमेरिका अन्य जी ७ सदस्यहरूसँग मिलेर रोकिएका सम्पत्तिबाट आएको ब्याज प्रयोग गरी युक्रेनलाई ५० अर्ब डलर ऋण दिने निर्णयमा सहमत भएको छ।

क्रेमलिनका प्रवक्ता दिमित्री पेस्कोभले रूस आफ्नो सम्पत्तिको अधिकार कहिल्यै नत्याग्ने चेतावनी दिँदै, पश्चिमले ती रकम कब्जा गरेर युक्रेनलाई हस्तान्तरण गर्ने प्रयास गरेमा गम्भीर कानुनी परिणाम भोग्नुपर्ने बताएका छन्।