काठमाडौँ — कवाड व्यवसायीहरूले बिहीवार काठमाडौँ महानगरपालिका विरुद्ध विरोध प्रदर्शन गरेका छन्। कवाड व्यवसायी संघर्ष समिति नेपालको आह्वानमा व्यवसायीहरू भृकुटीमण्डपमा भेला भई जुलुससहित कमलादीस्थित काठमाडौँ महानगरपालिका कार्यालयतर्फ पुगेका थिए। उनीहरूले महानगरपालिकाको नीतिविरुद्ध नाराबाजी गर्दै कार्यालय घेराउसमेत गरेका छन्।

व्यवसायी र मजदुरहरूले काठमाडौँ महानगरले दुई वर्षदेखि आफूहरूमाथि अन्यायपूर्ण व्यवहार गर्दै आएको दाबी गरेका छन्। विरोधमा सहभागी मजदुरहरूले ‘कवाड व्यवसायीको श्रमको सम्मान गर’, ‘अन्यायपूर्ण कार्य तुरुन्त बन्द गर’, ‘अदालतको निर्णयलाई सम्मान गर’जस्ता नारा लेखिएका प्लेकार्ड बोकेर आक्रोश व्यक्त गरेका थिए।