काठमाडौँ- दक्षिण कोरियाली कम्पनी जि–फिलोस कम्पनी लिमिटेडले नेपालमा ग्रीन हाइड्रोजन प्लान्ट तथा फ्युल सेल स्थापनाका लागि विस्तृत सम्भाव्यता अध्ययन प्रतिवेदन तयार गर्ने भएको छ। यसका लागि बिहीबार लगानी बोर्ड र कम्पनीबीच समझदारीपत्रमा हस्ताक्षर भएको हो।

सम्झौतामा लगानी बोर्डका प्रमुख कार्यकारी अधिकृत सुशील ज्ञवाली र जि–फिलोस कम्पनी लिमिटेडका सीईओ गा वु पार्कले हस्ताक्षर गरेका छन् । सम्झौताअनुसार कम्पनीले लगानी बोर्डबाट सर्वेक्षण अनुमतिपत्र प्राप्त गरेपछि करिब १० महिनाभित्र विस्तृत प्रतिवेदन पेस गर्नेछ।

हस्ताक्षर कार्यक्रममा नेपालका लागि दक्षिण कोरियाका राजदूत पार्क ताए योङले नेपालमा नवीकरणीय ऊर्जाको प्रचुर सम्भावना रहेको भन्दै यस्ता परियोजनाले दिगो विकास लक्ष्य हासिल गर्न सहयोग पुर्‍याउने र नेपाल–दक्षिण कोरिया सम्बन्धलाई नयाँ उचाइमा पुर्‍याउने उल्लेख गरे।प्रस्तावक कम्पनीले निर्दिष्ट समयमै गुणस्तरीय प्रतिवेदन पेस गर्ने विश्वास राख्दै ज्ञवालीले अध्ययन पश्चात यथासक्य छिटो नेपालमा ग्रीन हाइड्रोजन प्लान्ट स्थापना हुने प्रतिबद्धता व्यक्त गरेका थिए।

जि–फिलोस कम्पनीले सार्वजनिक–निजी साझेदारी ढाँचामा २०८२ वैशाख १५ गते लगानी बोर्डमा प्रस्ताव पेस गरेको थियो। त्यसलाई ६३औं बोर्ड बैठकले अनुमोदन गर्दै सर्वेक्षण अनुमति दिन र सम्झौता गर्न निर्णय गरेको थियो।