काठमाडौं – प्रधानमन्त्री तथा नेकपा एमालेका अध्यक्ष केपी शर्मा ओलीले प्रधानमन्त्रीको सरकारी निवास बालुवाटारमा बुधबार साँझ काठमाडौंबाट प्रतिनिधित्व गर्ने विधान महाधिवेशनका प्रतिनिधिलाई प्रशिक्षण दिएका छन्।

एमाले काठमाडौं अध्यक्ष दीपक निरौलाका अनुसार उक्त प्रशिक्षणको संयोजन रामेश्वर फुयाँलले गरेका थिए। निरौलाले प्रशिक्षणमा ओलीले दिएको निर्देशनात्मक मन्तव्यलाई ४८ बुँदामा संकलन गरी सार्वजनिक गरेका छन्।

ओलीले प्रशिक्षणका क्रममा पार्टीभित्रको अन्तरसंघर्ष, विधान महाधिवेशनको प्रक्रिया र राष्ट्रिय राजनीति बारे प्रस्तुत गरेका विचार उनले आफ्नो फेसबुकमार्फत सार्वजनिक गरेका हुन् ।

निरौलाले सार्वजनिक गरेका ३६ नम्बर बुँदा अनुसार , वर्तमान परिप्रेक्षमा अध्यक्ष ओलीसँग प्रतिष्पर्धा गर्न सक्ने भनेको पुर्व राष्ट्रपति भण्डारी मात्रै रहेको र भण्डारी बाहेक कसैमा त्यो दम नभएको र उँहाले सकृय राजनीतिमा फर्कने कुरा त्यागेमा सबै कुरा मिल्ने ओलीको टिप्पणी रहेको बताएका छन्। साथै ओलीले उनको सदस्यता नवीकरण नगर्ने बताएको पनि उल्लेख गरेका छन्।