काठमाडौं- राष्ट्रिय सभाको विधायन व्यवस्थापन समितिले संघीय निजामती सेवा विधेयकमा सहसचिव पदमा १० प्रतिशत खुला प्रतिस्पर्धा राख्ने सहमति गरेको छ।

छलफलमा सहभागी सांसदहरूले सहसचिवमा खुला प्रतिस्पर्धा आवश्यक रहेको प्रस्ताव राखेका थिए। सोही अनुरूप विधायन समितिले उक्त निर्णय गरेको हो।

प्रतिनिधिसभाले यसअघि निजामती सेवामा उपसचिव पदमा मात्र खुला प्रतिस्पर्धा हुने गरी विधेयक पारित गरेको थियो। तर, विधायन समितिले सहसचिवमा पनि १० प्रतिशत खुला प्रतिस्पर्धा राख्ने निर्णय गर्दै प्रतिनिधिसभाको निर्णय उल्टाएको छ।

त्यसैगरी, नासु पदमा पनि प्रतिनिधिसभाले शतप्रतिशत प्रतिस्पर्धाबाट पदपूर्ति गर्ने प्रस्ताव पठाएकोमा राष्ट्रिय सभामा सांसदहरूले प्रचलित व्यवस्थाअनुसार खुला प्रतिस्पर्धाबाट पदपूर्ति गर्ने विषयमा छलफल गरिरहेका छन्।