दिल्ली-अमेरिकी राष्ट्रपति डोनाल्ड ट्रम्पले भारतमाथि ५० प्रतिशत आयात शुल्क लगाउने निर्णय लागू भएको छ। यसअघि उनले भारतले रूसबाट तेल र हतियार खरिद गरेको भन्दै थप २५ प्रतिशत दण्डात्मक शुल्क लगाउने कार्यकारी आदेश दिएका थिए। यो निर्णयले भारतलाई विश्वमै सबैभन्दा बढी अमेरिकी शुल्कको मार खेप्ने देशहरूमध्ये एक बनाएको छ, जबकि भारत अमेरिका कै इनडो–प्यासिफिक क्षेत्रको प्रमुख साझेदार हो।

यस कदमले विश्वको पाँचौं ठूलो अर्थतन्त्र भारतको निर्यात र विकासमा ठूलो असर पार्ने अपेक्षा गरिएको छ, किनभने अमेरिका हालसम्म भारतको सबैभन्दा ठूलो व्यापारिक साझेदार रहँदै आएको थियो।

यस संकटलाई कम गर्न भारतीय प्रधानमन्त्री नरेन्द्र मोदीले आम नागरिक र साना व्यवसायीलाई लक्षित गर्दै ठूलो कर छुटको घोषणा गरेका छन्। उनले यसलाई “विशाल कर उपहार” भन्दै एशियाको तेस्रो ठूलो अर्थतन्त्रलाई चलायमान बनाउने साना व्यवसाय र सामान्य जनतालाई राहत दिने बताएका छन्।

यसअघि नै यस वर्षको बजेटमार्फत १२ अर्ब डलर बराबरको आयकर छुट घोषणा गरेका मोदी अब अप्रत्यक्ष कर प्रणाली (जीएसटी) मा व्यापक सुधार गर्दै दर घटाउने र सरलीकरण गर्ने तयारीमा छन्, जसले खर्च बढाउन र ‘भारतमा उत्पादन, भारतमै खर्च’ गर्ने वातावरण बनाउन सक्ने आशा गरिएको छ।