काठमाडौं – यातायात व्यवस्था विभागले इम्बोस्ड नम्बर प्लेट अनिवार्यताबारे उत्पन्न भएको भ्रम स्पष्ट गर्दै हाललाई कुनै दण्ड–जरिवाना नहुने जनाएको छ। विभागले असोज १ गतेदेखि नम्बर प्लेट जडान नगरे तुरुन्त कारबाही हुन्छ भन्ने गलत धारणा बनेको भन्दै त्यस्तो स्थिति नहुने स्पष्ट पारेको हो।

मंगलबार जारी विज्ञप्तिमा विभागले सरकारी, निजी र सार्वजनिक सवारीसाधनमा क्रमशः इम्बोस्ड नम्बर प्लेट जडान गर्ने निर्णय भएको जनाएको छ। विभागले भनेको छ, “२०८२ असोज १ गतेदेखि जडान नगरे तत्काल कारबाही हुन्छ भन्ने भ्रम फैलिएको छ, तर तत्काललाई कुनै किसिमको दण्ड–जरिवाना हुनेछैन ।”

सवारीसाधन दर्ता भएका सम्बन्धित यातायात कार्यालयमा गई स्वस्फुर्त ढंगले नम्बर प्लेट जडान गर्न विभागले सवारीधनीलाई आग्रह समेत गरेको छ।

त्यसैगरी, नम्बर प्लेटमा प्रयोग हुने भाषाबारे सर्वोच्च अदालतको संवैधानिक इजलासले अंग्रेजी लिपि प्रयोग वैधानिक रहेको ठहर गरिसकेको विभागले जनाएको छ।