काठमाडौं – नेपाल राष्ट्र बैंकले विदेशी मुद्रा बोक्ने नियममा नयाँ व्यवस्था गरेको छ। अबदेखि नेपाल भित्रिने वा बाहिरिने यात्रुले अधिकतम ५,००० अमेरिकी डलरसम्म नगद बोक्न पाउनेछन्। यसभन्दा बढी रकम बोक्न चाहनेहरूले भने सीमा नाकामा भन्सारमा अनिवार्य घोषणा गर्नुपर्नेछ।

राष्ट्र बैंकले २००, ५०० र २,००० रुपैयाँका भारतीय नोट बोक्न र प्रयोग गर्न भने प्रतिबन्ध लगाएको छ। साथै, नेपाली नागरिकहरूले भारतबाहेक अन्य मुलुकतर्फ यात्रा गर्दा भारतीय रुपैयाँ लैजान नपाउने व्यवस्था गरिएको छ। भारत सरकारले अवैध घोषित गरिसकेको ५०० र १,००० रुपैयाँका पुराना नोटहरू प्रयोग नगर्न समेत सुझाव दिइएको छ।

राष्ट्र बैंकका अनुसार यी नियमहरू विदेशी विनिमय (नियम) ऐन २०१९ (१९६२), अपराधिक गतिविधिबाट प्राप्त आय शुद्धीकरण निवारण ऐन २०६४ (२००८), र नेपाल राजपत्रमा प्रकाशित सूचनाअनुसार लागु भएका हुन्।

एफएटिएफ (फिनान्सियल एक्सन टास्क फोर्स ) द्वारा सेप्टेम्बर २०२३ मा सार्वजनिक प्रतिवेदनले नेपालमा नगद घोषणा प्रणालीको अभाव देखाउँदै सीमावर्ती क्षेत्रमा बढ्दो सुन, चाँदी र नगद तस्करीबारे गम्भीर चिन्ता जनाएपछि, सरकारले नेपाललाई “ग्रे लिस्ट” बाट हटाउने प्रयासस्वरुप यी कदमहरु चालिएको बताइएको छ।