किभ – युक्रेनका राष्ट्रपति भोलोदिमिर जेलेन्स्कीले युक्रेनको स्वतन्त्रता दिवसको अवसरमा युक्रेनले कहिल्यै हार नमान्ने र युक्रेनी जनताले खोजेको शान्ति नमिलेसम्म लडिरहने प्रतिज्ञा गरेका छन् । युक्रेनका जनताले आफ्ना भविष्यको निर्णय आफैँ गर्न सक्ने न्यायपूर्ण शान्ति चाहेको भन्दै, युक्रेन कुनै पीडित राष्ट्र नभएर एक लडाकु देश भएको बताएका छन्।

युक्रेनको स्वतन्त्रता दिवसको अवसरमा, किभमा क्यानडाका प्रधानमन्त्री मार्क कार्नी ,अमेरिकी प्रतिनिधि कीथ केलोग लगायतका अन्तराष्ट्रिय व्यक्तिहरुको पनि सहभागिता रहेको थियो। कार्नीले ड्रोन, गोलाबारुद र बख्तरबन्द सवारीसहित करिब २ अर्ब क्यानाडियन डलरको सैन्य सहयोग दिने वाचा समेत गरेका छन् । अमेरिकी प्रतिनिधि कीथ केलोगले , राष्ट्रपति डोनाल्ड ट्रम्पले अर्थहीन हत्या अन्त्य गर्न आग्रह गर्दै पठाएको पत्र जेलेन्स्कीलाई दिएका थिए । बेलायतका राजा चार्ल्सले युक्रेनीहरूको अटुट शक्तिको प्रशंसा गरेर पत्र पठाएका थिए भने, बेलायतले २०२६ सम्म युक्रेनी सैनिकलाई तालिम दिने बताएको छ।

नर्वेले जर्मनीसँग सहकार्य गर्दै करिब ६९३ मिलियन डलर बराबरको वायु प्रतिरक्षा प्रणाली दिने घोषणा गर्‍यो भने स्विडेनले युक्रेनसँग मिलेर रक्षा सामग्री उत्पादन गर्ने सहमति जनाएको छ।

यता, गत हप्ता अलास्कामा डोनाल्ड ट्रम्प र भ्लादिमिर पुटिनबीच भएको शिखर सम्मेलनबाट कुनै नतिजा ननिस्किएको र युरोपेली मुलुकले निरन्तर सैन्य सहयोग उपलब्ध गराउने बताएसँगै शान्ति प्रयासहरू भने कमजोर हुँदै गएका छन्। ट्रम्पले असन्तुष्टि व्यक्त गर्दै रुसमाथि नयाँ प्रतिबन्ध लगाउने चेतावनी समेत दिएका छन्। जेलेन्स्कीले रूसलाई वार्ता अवरुद्ध गरेको आरोप लगाएको छ भने, मस्कोले पनि किभले वार्ताको एजेन्डा स्वीकार नगरेको बताएको छ।

हाललाई युरोपेली मुलुक, अमेरिका र बेलायतको समर्थनमा रहेको युक्रेन पछि हट्ने कुनै संकेत देखिएको छैन, जसले गर्दा तत्कालको लागी दीर्घकालीन शान्ति सम्झौता हुनेकुरा अनिश्चित जस्तै बन्न पुगेको छ।