काठमाडौं – यातायात व्यवस्था विभागले आगामी असोज १ गतेदेखि सबै सवारीसाधनमा इम्बोस्ड नम्बर प्लेट अनिवार्य गर्ने निर्णय गरेको छ।

विभागले सूचना जारी गर्दै हालसम्म सामान्य नम्बर प्लेट प्रयोग गर्दै आएका सवारीसाधन मालिकलाई आधुनिक प्रविधियुक्त इम्बोस्ड नम्बर प्लेट जडान गर्न आग्रह गरेको छ।

गत साउन २० गते भौतिक पूर्वाधार तथा यातायातमन्त्री देवेन्द्र दाहालको अध्यक्षतामा बसेको विषयगत समितिको बैठकले सबै प्रदेशमा इम्बोस्ड नम्बर प्लेट अनिवार्य गर्ने निर्णय गरेको थियो।

विभागका अनुसार असोज १ गतेदेखि सवारीसाधन दर्ता, नामसारी र नवीकरण गर्दा इम्बोस्ड नम्बर प्लेट जडान नगरी प्रक्रिया अगाडि बढाउन पाइनेछैन।

इम्बोस्ड नम्बर प्लेट जडान शुल्क मोटरसाइकलका लागि २ हजार ५ सय, तीन पांग्रे सवारीका लागि २ हजार ९ सय, चारपांग्रे सवारीका लागि ३ हजार २ सय र ठूला (हेभी) सवारीसाधनका लागि ३ हजार ६ सय रुपैयाँ तोकिएको विभागले जनाएको छ।