काठमाडौं – सरकारले उखुमा दिँदै आएको अनुदान कटौती गरेको विरोधमा देशभरका उखु किसानहरूले आजदेखि राजधानी काठमाडौंको माइतीघरमा अनिश्चितकालीन धर्ना सुरु गरेका छन्।

नेपाल उखु उत्पादक महासंघका अध्यक्ष कपिलमुनी मैनालीका अनुसार उखुको लाँक्रासहित काठमाडौं आएका किसानहरूले अनुदान निरन्तरता दिनुपर्ने माग राख्दै धर्ना सुरु गरेका हुन्।

यस धर्नामा तराई–मधेसका १३ जिल्लाका अगुवा किसानहरूको सहभागिता छ। सर्लाही, महोत्तरी, सिराहा, रौतहट, बारा, सुनसरी, मोरङ, नवलपरासी, कञ्चनपुरलगायतका जिल्लाबाट किसान काठमाडौं आएका छन्।

गत असार अन्तिम साता बसेको मन्त्रिपरिषद् बैठकले किसानले पाउँदै आएको प्रतिक्विन्टल उखुमा ७० रुपैयाँ अनुदान कटौती गर्ने निर्णय गरेको थियो। अघिल्लो वर्ष क्रसिङ भएको उखुमा प्रतिक्विन्टल ३५ रुपैयाँ दिने निर्णय भए पनि चालु आर्थिक वर्षको बजेटमा भने अनुदानका लागि कुनै व्यवस्था नगरीएपछि यस वर्ष क्रसिङ हुने उखुमा पनि किसानले अनुदान नपाउने प्रायः निश्चित देखिएको छ।

किसानहरूले सन् २०६६ सालदेखि उखुमा अनुदान पाउँदै आएका थिए। तर चालु आर्थिक वर्षको बजेटमा अनुदानको व्यवस्था नगरेको सरकारले अघिल्लो वर्ष क्रसिङ भएको उखुको पनि बाँकी अनुदान अझै उपलब्ध गराएको छैन। सर्लाहीका किसानहरूले मात्रै ३७ करोड ३९ लाख ९५ हजार ३७९ रुपैयाँ अझै पाउन बाँकी छ।

अनुदान कटौतीको निर्णयले लाखौं किसान उखु खेतीबाट पलायन हुने अवस्था आएको भन्दै किसानहरूले असन्तोष व्यक्त गरेका छन्। उनीहरूले प्रतिक्विन्टल ७० रुपैयाँ अनुदानलाई निरन्तरता दिन सरकारसँग माग गरेका छन्।