काठमाडौँ – राष्ट्रिय स्वतन्त्र पार्टी (रास्वपा) बागमती प्रदेश प्रशिक्षण विभाग संयोजक हरिप्रसाद कँडेल नक्कली शैक्षिक प्रमाणपत्र प्रकरणमा पक्राउ परेका छन्। रुपन्देही प्रहरीले उनको इन्स्टिच्युटले नक्कली प्रमाणपत्र किनबेच गर्ने गरेको पाएको भन्दै उनलाई नियन्त्रणमा लिएको हो।

यसअघि भदौ १ गते रुपन्देहीको सिद्धार्थनगर नगरपालिका–१ बेलहिया बसपार्कबाट भारतका २५ वर्षीय अभिषेक यादव पक्राउ परेका थिए। उनको साथबाट नेपाल र भारतका विभिन्न विश्वविद्यालय र शैक्षिक संस्थाका नक्कली प्रमाणपत्र, स्टाम्प, होलोग्राम र स्टिकर बरामद गरिएको थियो।

प्रहरीलाई अभिषेक यादवले ती कागजात कँडेलकै मागअनुसार भारतमा छपाएर नेपाल ल्याएको बयान दिएका थिए। सोही आधारमा रुपन्देही प्रहरीले चितवनको कालिका नगरपालिका–५ निवासी ५० वर्षीय कँडेललाई पक्राउ गरी रुपन्देही लगिएको जनाएको छ।

कँडेलले चितवनको लायन्स चोकमा सञ्चालन गरेको कार्यालयमार्फत नक्कली प्रमाणपत्र किनबेच गर्दै आएको खुलेको प्रहरीले जानकारी दिएको छ।