कोलम्बो- श्रीलङ्काका पूर्वराष्ट्रपति रानिल विक्रमसिंघे सरकारी रकम दुरुपयोग गरेको आरोपमा पक्राउ परेका छन् ।

यो मुद्दा उनले राष्ट्रपतिका रूपमा कार्यरत रहँदा गरेका वैदेशिक यात्रासँग सम्बन्धित छ। उनी शुक्रबार कोलम्बोस्थित एक जिल्ला अदालतमा उपस्थित हुनेछन्। त्यसअघि उनले बिहीबारै आपराधिक अनुसन्धान विभागमा बयान दिएका थिए।

७६ वर्षीय विक्रमसिंघेले २०२२ देखि २०२४ सम्म राष्ट्रपति पद सम्हालेका थिए। उनले देशकै भीषण आर्थिक सङ्कटको बीचमा पदभार ग्रहण गरेका थिए, जुन समयमा तत्कालीन राष्ट्रपति गोटबाया राजपाक्षे जनआन्दोलनका कारण देश छाडेर भागेका थिए। विक्रमसिंघेलाई मुलुकलाई आर्थिक पुनःस्थापनाको बाटोमा फर्काएको श्रेय दिइन्छ।

उनले १९९० को दशकदेखि छ पटक प्रधानमन्त्रीको पद पनि सम्हालेका थिए।

बीबीसी सिंहलाका अनुसार, उनले राष्ट्रपति रहँदा २३ पटक वैदेशिक यात्रा गरेका थिए जसको खर्च करिब २० लाख अमेरिकी डलर भएको थियो।

उनको पक्राउ २०२३ मा भएको बेलायत भ्रमणसँग जोडिएको बताइएको छ। उनि क्यूबामा आयोजित जी ७७ सम्मेलनमा भाग लिएर फर्कँदै गर्दा बेलायतमा रोकिएको त्यस क्रममा उनी र उनकी पत्नी वुल्भरह्याम्पटन विश्वविद्यालयको एउटा कार्यक्रममा सहभागी भएका थिए।

सीआईडीले यो व्यक्तिगत भ्रमण भएको र यसका लागि सरकारी रकम प्रयोग गरिएको दाबी गरेको छ। तर विक्रमसिंघेले भने उक्त आरोप अस्वीकार गरेका छन्।