काठमाडौँ – मंगलबार बिहान नेकपा एमाले र काँग्रेसले छुट्टाछुट्टै रुपमा पार्टीको आकस्मिक बैठक बोलाएको छ, जसमा उपसभामुख इन्दिरा रानाविरुद्ध अविश्वास प्रस्ताव दर्ता गर्ने विषयमा छलफल हुने अपेक्षा गरिएको छ।

स्रोतका अनुसार, सोमबार साँझ प्रधानमन्त्री निवास बालुवाटारमा बसेको बैठकमा उपसभामुखलाई पदअनुसार कार्य नगरेकोमा हटाउने प्रारम्भिक समझदारी जुटाइएको थियो। उक्त बैठकमा कांग्रेस र एमालेका नेताहरू सहभागी थिए। सहभागीमध्ये प्रधानमन्त्री केपी शर्मा ओली, कांग्रेस उपाध्यक्ष पूर्णबहादुर खड्का, गृहमन्त्री रमेश लेखक लगायतका नेताहरू थिए।

दुवै दलले उपसभामुख रानाले पदीय आचार अनुसार काम नगरेको आरोप लगाएका छन्। स्रोतका अनुसार, उपसभामुखविरुद्ध प्रस्तावलाई समर्थन गर्न कांग्रेस र एमालेका सांसदहरूको हस्ताक्षर संकलन भइरहेको छ। केही सांसदहरूले भने हिजो नै हस्ताक्षर गरिसकेका छन्।

हाल उपसभामुख इन्दिरा राना अमेरिका भ्रमणमा छिन् । उनको सचिवालयका अनुसार उनी व्यक्तिगत भ्रमणमा गत साउन ३० गते अमेरिका गएकी हुन् । उनि यही भदौ १३ गते स्वदेश फर्किने कार्यक्रम छ ।

यसअघि, संसदको सुशासन समितिमा उपसभामुख इन्दिरा रानाविरुद्ध उजुरी दर्ता भएको थियो। उजुरीमा उनले आफ्नो पदको दुरुपयोग गरी काठमाडौंस्थित अमेरिकी दूतावासमा गैर-संसदीय व्यक्तिहरूको भिसा अन्तर्वार्ता मिलाएको आरोप लगाइएको थियो।