वासिङ्टन– युक्रेनी राष्ट्रपति भोलोडिमिर जेलेन्स्कीले नाटो सदस्यता त्यागेर र केही भूभाग छोडेर सम्झौतामा सहमत भए भने रुससँगको युद्ध तुरुन्तै अन्त्य हुन सक्ने अमेरिकी राष्ट्रपति डोनाल्ड ट्रम्पले बताएका छन्।

जेलेन्स्कीलाई यसै प्रस्तावबारे छलफल गर्न सोमबार व्हाइट हाउस बोलाइएको छ। रिपोर्टअनुसार यस योजनामा डोनबासका बाँकी क्षेत्र छोड्ने र अन्य मोर्चामा युद्ध रोक्ने शर्तसहित सम्झौता गर्ने प्रस्ताव छ। तर जेलेन्स्कीले यस्ता शर्त अस्वीकार गर्दै क्राइमिया र अन्य कब्जा गरिएका भूभाग युक्रेनकै हिस्सा भएको दोहोर्याएका छन्।

ट्रम्पले आफ्नो ट्रुथ सोसियल पोस्टमा क्राइमिया ओबामा प्रशासनका समयमा, विना गोलि र विना हतियार गुमेको स्मरण गराउँदै युक्रेनलाई नाटोमा प्रवेश गर्न नदिइने बताएका छन् । शान्तिका लागि केही सम्झौता गर्न जरुरी हुने उनको तर्क छ।

यो बैठक ट्रम्प र रुसी राष्ट्रपति भ्लादिमिर पुटिनबीच अलास्कामा भएको भेटपछि हुन लागेको हो, जहाँ दुवैले भविष्यका वार्ताबारे सतर्क आशावाद व्यक्त गरेका थिए।

मास्कोले भने युक्रेनले नाटो आकांक्षा त्याग्नुपर्ने, निशस्त्रीकरण स्वीकार गर्नुपर्ने र क्राइमिया, डोनेट्स्क, लुगान्स्क, खेरसोन र जापोरोजियासहितका भूभागलाई रसियाली नियन्त्रणमुनि मान्यता दिनुपर्ने अडान दोहोर्याउँदै आएको छ।

राष्ट्रपति पुटिनले दिगो सम्झौताले रसियाको सुरक्षा चासोलाई सम्बोधन गर्नुपर्ने र युरोपमा शक्ति सन्तुलन पुनःस्थापना गर्नुपर्ने बताए। यसैबीच, अमेरिकी विशेष दूत स्टिभ विट्कफले वासिङ्टन र उसका साझेदारहरूले नाटो बाहिर युक्रेनलाई सुरक्षा ग्यारेन्टी दिने सम्भावना अध्ययन गरिरहेको बताए।