काठमाडौं- भारतीय विदेश सचिव विक्रम मिश्रीले आज राष्ट्रपति रामचन्द्र पौडेलसँग भेटवार्ता गरेका छन्।

भेटमा राष्ट्रपति पौडेलले नेपाल र भारतबीचको ऐतिहासिक सामाजिक, सांस्कृतिक, धार्मिक, आध्यात्मिक, आर्थिक र जनस्तरीय सम्बन्धलाई उल्लेख गर्दै यी सम्बन्धहरू सार्वभौमिक समानता, आपसी सम्मान, विश्वास र मैत्रीपूर्ण सहयोगमा आधारित रहेको बताए। उनले भारतको प्रगतिबाट नेपाल लाभान्वित भएको र आगामी दिनमा अझ बढी फाइदा लिन चाहेको पनि प्रष्ट पारे।

विदेश सचिव मिश्रीले भने भारतीय प्रधानमन्त्री नरेन्द्र मोदीको छिमेकी मुलुकहरूसँगको सम्बन्धलाई प्राथमिकता दिने नीतिअनुसार नेपाललाई उच्च स्थानमा राखिएको बताए। उनले आफ्नो भ्रमणमार्फत दुवै मुलुकबीच आधुनिक युगमा कनेक्टीभिटी र विकासका क्षेत्रमा सहयोग बढाउने अवसर खोजिने र यसले नेपाल–भारत सम्बन्धलाई अझ मजबुत बनाउने विश्वास व्यक्त गरे।

काठमाडौं आइपुगेका मिश्रीले यसअघि प्रधानमन्त्री केपी शर्मा ओलीसँग पनि भेट गरेका छन्। उनले सोमबार पशुपतिनाथ मन्दिरको दर्शन गरेर भारत फर्किने कार्यक्रम तय गरेका छन्। मिश्री प्रधानमन्त्री ओलीको आगामी भदौ ३१ गते हुने भारत भ्रमणका तयारीका लागि काठमाडौं आएका हुन्।