किभ, युक्रेन — अलास्कामा अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच भएको उच्चस्तरीय शिखर बैठक युक्रेनबारे कुनै औपचारिक सम्झौताविना टुंगिएपछि युक्रेनी राष्ट्रपति भ्लादिमिर जेलेन्स्की सोमबार वाशिंगटन प्रस्थान गर्ने भएका छन्। त्यहाँ जेलेन्स्कीले अमेरिकी राष्ट्रपति ट्रम्पसँग प्रत्यक्ष वार्ता गर्नेछन्।

जेलेन्स्कीले आफ्नो टेलिग्राम च्यानलमार्फत भ्रमणको पुष्टि गर्दै ट्रम्पसँग करिब ९० मिनेट लामो अर्थपूर्ण संवाद भएको बताए। फोन वार्ताको क्रममा ट्रम्पले पुटिनसँगको छलफलका मुख्य बुँदाहरू जानकारी दिएका थिए। उनले भने, “म सोमबार वाशिंगटनमा राष्ट्रपति ट्रम्पसँग युद्ध अन्त्य गर्ने सबै विवरणबारे छलफल गर्न जाँदैछु। निमन्त्रणा दिनुभएकोमा धन्यवाद।”

वाइट हाउस प्रेस सचिव क्यारोलिन लिभिटका अनुसार, ट्रम्प वाशिंगटन फर्कँदै गर्दा विमानमै जेलेन्स्की र केही नाटो नेताहरूसँग टेलिफोन सम्पर्कमा थिए । पछि उनले सामाजिक सञ्जालमा लेखे कि युद्ध अन्त्य गर्ने सर्वोत्तम उपाय अस्थायी युद्धविराम होइन, प्रत्यक्ष शान्ति सम्झौता हो, किनभने युद्धविराम प्रायः टिक्दैन।

जेलेन्स्कीले अमेरिका, रुस र युक्रेनबीचको त्रिपक्षीय बैठक प्रस्तावको समर्थन गरेका छन् । साथै उनले पश्चिम युरोपेली साझेदारहरूले सम्पूर्ण प्रक्रियामा संलग्न रहनुपर्नेमा जोड दिए, ताकि किभले भरपर्दो अमेरिकी सुरक्षा ग्यारेन्टी पाओस्। उनले भने, “युक्रेनको सुरक्षामा अमेरिकी सहभागिताबारे सकारात्मक संकेतहरू छलफलमा आएका छन्।”

ट्रम्प- पुटिन अलास्का समिटपछि सुरु भएको कूटनीतिक पहलले आगामी हप्ता अमेरिकी राष्ट्रपति ट्रम्पसँग प्रत्यक्ष वार्तापछि रुस युक्रेन युद्ध अन्त्यतर्फ अगाडी बढ्न सक्ने आशा बढाएको छ।