काठमाडौँ- संसदको शिक्षा, स्वास्थ्य तथा सूचना प्रविधि समितिबाट पारित विद्यालय शिक्षा विधेयकप्रति असन्तुष्टि जनाउँदै निजी विद्यालय सञ्चालक संगठन प्याब्सन र एनप्याब्सनले संयुक्त रूपमा आन्दोलन कार्यक्रम घोषणा गरेका छन्।

प्याब्सनका अध्यक्ष कृष्णप्रसाद अधिकारी र एनप्याब्सनका अध्यक्ष सुभाष न्यौपानेले जारी गरेको विज्ञप्तिमा सबै तहका समितिलाई आन्दोलनको तयारी गर्न आग्रह गरिएको छ।

घोषित कार्यक्रमअनुसार आज देशभरका पालिका प्रमुख र शिक्षा शाखामा ज्ञापनपत्र बुझाइँदैछ। शुक्रबार जिल्ला प्रशासन कार्यालय, जिल्ला समन्वय समिति र शिक्षा विकास तथा समन्वय इकाइमा ज्ञापनपत्र बुझाइनेछ। भदौ १ गते प्रदेशका मुख्यमन्त्री र सामाजिक विकासमन्त्री, भदौ २ गते क्षेत्रीय सांसदहरूलाई ज्ञापनपत्र बुझाइनेछ।

यसपछि भदौ ३ गते पालिका, ४ गते जिल्ला, ५ गते प्रदेशस्तरीय आन्दोलनको तयारी बैठक र भदौ ६ गते केन्द्र तथा प्रदेशस्तरीय सरोकारवालासँग अन्तरक्रिया कार्यक्रम गर्ने योजना छ।