“झुटा कथा सिर्जना गरेर सोशल मिडियामा कन्टेन्ट उत्पादन गर्ने प्रवृत्ति बढ्यो”

काठमाडौँ – प्रधानमन्त्री केपी शर्मा ओलीले प्रतिनिधिसभामा सम्बोधन गर्दै हालै सम्पन्न तुर्कमेनिस्तान भ्रमणबारे जानकारी दिएका छन् र त्यसपछि सहकारी ठगी प्रकरणमा रुपन्देही कारागारमा रहेका राष्ट्रिय स्वतन्त्र पार्टी (रास्वपा) अध्यक्ष रवि लामिछाने र उनको पार्टीप्रति कडा टिप्पणी गरेका छन्।

ओलीले संसदमाआवश्यक नीति तथा कार्यक्रमबारे बहस हुनुपर्ने ठाउँमा झुटा कथा सिर्जना गरेर सोशल मिडियामा कन्टेन्ट उत्पादन गर्ने प्रवृत्ति बढेको बताए। उनले भने, “आज संसदमाउठाइएका कतिपय विषय राष्ट्रिय प्राथमिकता र आवश्यकता आधारित छैनन्। यसलाई सोशल मिडियाका लागि मात्र प्रयोग गर्ने दुष्प्रयास भइरहेको छ। के यही हाम्रो राष्ट्रिय आवश्यकता हो?”

रास्वपाले लामिछानेमाथि सरकारले राजनीतिक प्रतिशोध लिएको आरोपको प्रतिवाद गर्दै ओलीले सहकारीमा बचत हिनामिना गर्ने सयौँ व्यक्तिमाथि मुद्दा चलिरहेको र धेरैजना थुनामा रहेको स्मरण गराए। उनले प्रश्न गरे, “यदि एउटामाथि मात्र प्रतिशोध भएको हो भने थुनामा रहेका अरु सबैको के हो? त्यो कानुनी कारबाही होइन?”

उनले लोकतान्त्रिक प्रणालीलाई ‘पेसेवर मास मेनिपुलेसन’ बाट जोगाउनुपर्ने आवश्यकता औंल्याउँदै लामिछानेको वैदेशिक नागरिकता र दोहोरो विवाह प्रति इङ्गित गर्दै भने,”कतिसम्म भने भिजिट भिसामा विदेश गएर उतैको नागरिकता लिएर, उताको नागरिकता नत्यागी नेपाल फर्केर मन्त्रीसम्म भएका प्रमाणित अभियुक्तहरु र भिजिट भिसामा गएर उतै दुईदुई पटक बिहे गरिसकेका व्यक्तिहरुले समेत अन्तर्राष्ट्रिय विमानस्थलमा प्लेन चढ्ने सबै नागरिकलाई ‘बेचिएको’ भन्ने भाष्य स्थापित गर्न खोजिरहेका छन् । यसका पछाडी मुलुक र नागरिकको हित जोडिएको छैन, यसले इमोसनल ब्ल्याकमेलिङ मार्फत आफ्नो स्वार्थको रोटी सेक्ने प्रवृत्ति मात्र उजागर गरेको छ ।” जनताको मत पाएर आएको प्रतिपक्ष पनि देशप्रतिको दायित्वबाट विमुख हुन नमिल्ने उनले बताएका छन् ।