काठमाडौं – विभिन्न उच्च अदालतमा नियुक्त २७ जना न्यायाधीशले बुधबार पद तथा गोपनीयताको शपथ ग्रहण गरेका छन्।

प्रधानन्यायाधीश प्रकाशमान सिंहको उपस्थितिमा उच्च अदालत पाटनका मुख्य न्यायाधीश लालबहादुर कुँवरसमक्ष उनीहरूले शपथ लिएका हुन्।

न्याय परिषद्को साउन २२ गतेको बैठकले २७ जनालाई नियुक्ति र पदस्थापनको सिफारिस गरेको थियो। सिफारिस हुनेमा न्याय परिषद्का सचिव यमबहादुर बुढा, सर्वोच्च अदालतका सह–रजिस्ट्रार तथा प्रवक्ता अच्युत कुइँकेललगायत छन्।

जिल्ला न्यायाधीशबाट १६ जना उच्च अदालतमा बढुवा भएका छन्, कानुन व्यवसायीबाट ६ जनाले अवसर पाएका छन्, भने न्याय, सरकारी वकिल र कानुन अधिकृत समूहबाट ५ जना नियुक्त भएका छन्।

नियुक्त न्यायाधीशहरूले एक महिनाको तालिमपछि मात्र आफ्नो कार्यक्षेत्रमा जिम्मेवारी सम्हाल्नेछन्। तालिमको व्यवस्था राष्ट्रिय न्यायिक प्रतिष्ठानले गरिरहेको छ।