काठमाडौं – मंगलबार प्रतिनिधि सभाको बैठकमा बोल्दै प्रतिनिधि सभा अन्तर्गतको राज्य व्यवस्था तथा सुशासन समितिको सभापति पदबाट रामहरि खतिवडाले राजीनामा दिएका छन् ।

राज्य व्यवस्था समितिबाट पारित भएको कुलिङ पिरियड सम्बन्धी विधेयकको प्रतिवेदनमा गम्भीर त्रुटि भएको संसदीय छानबिन समितिले निष्कर्ष निकालेपछि समितिका सभापतिले नैतिक जिम्मेवारी बहन गर्नुपर्ने बहस चलिरहेका बेला खतिवडाले राजिनामा दिएका हुन्।

प्रतिवेदन लेखन कार्यमा कानुन न्याय तथा संसदीय मामिला मन्त्रालय र संघीय मामिला मन्त्रालयका कर्मचारीहरू संलग्न रहेको भन्दै , निजामती विधेयकमा भएको त्रुटि आफू र राज्य व्यवस्था समितिका सदस्यहरूबाट नभएको तथापि, अन्तिम रुपमा गहिरिएर नहेर्नु कमजोरी रहेको उनले स्वीकार गरेका छन्।