युरोपियन युनियनले अमेरिकी राष्ट्रपति डोनाल्ड ट्रम्पको युक्रेन–रूस ‘ल्याण्ड स्वाप ’ प्रस्तावलाई कडाईका साथ अस्वीकार गर्दै रूसले पूर्ण र बिना शर्त युद्धविराम स्वीकार गर्नुपर्ने जनाएको छ।

“रूसले युद्धविराम स्वीकार गरेको छैन; हामीले ‘ल्याण्ड स्वाप ’को कुरा नै गर्नु हुँदैन,” इयूकी परराष्ट्र नीति प्रमुख काया कलासले युरोपेली संघका परराष्ट्र मन्त्रीहरू र युक्रेनी परराष्ट्र मन्त्री अन्द्रिय सिबिहासँगको बैठकपछि सञ्चार माध्यमसंगको कुराकानीमा बताएकी छन् ।

शुक्रबार अलास्कामा हुने ट्रम्प र रूसी राष्ट्रपति भ्लादिमिर पुटिनबीचको निर्धारित बैठक अघि भएको छलफलमा रूसमाथि थप प्रतिबन्ध, युक्रेनलाई थप सैन्य सहायता र आर्थिक सहयोगबारे पनि विचार-विमर्श गरिएको बताइएको छ । कलासले कुनै पनि अमेरिका–रूस वार्तामा युक्रेन र इयूको सहभागिता अनिवार्य हुनुपर्ने समेत बताएकी छन्।

“दीर्घकालीन र न्यायसंगत शान्तितर्फ अघि बढ्दा अन्तर्राष्ट्रिय कानुन स्पष्ट छ—अस्थायी रूपमा कब्जा गरिएका सबै भूभाग युक्रेनकै हुन्,” उनले चेतावनी दिँदै आक्रमणलाई पुरस्कृत गर्नु शान्तिका लागि हानिकारक हुने कुरामा जोड दिएकि छन्।

गत साता युके, फ्रान्स, जर्मनी, इटाली, पोल्याण्ड, फिनल्याण्ड र इयूका नेताहरूले संयुक्त विज्ञप्ति जारी गर्दै “युक्रेनमा शान्तिको बाटो युक्रेनबिना तय हुन सक्दैन” भन्ने साझा अभिव्यक्ति समेत दिएका छन्।

युक्रेनी राष्ट्रपति भोलोदिमिर जेलेन्स्कीले पनि ट्रम्पको प्रस्ताव अस्वीकार गर्दै भने, “युक्रेनीहरूले आफ्नो भूमि रुसलाई दिने छैनन्। युक्रेनबिना गरिएका कुनै पनि निर्णय शान्तिविरुद्धका निर्णय हुन्।”