स्टकहोममा सम्पन्न चीन–अमेरिका आर्थिक तथा व्यापार बैठकपछि दुवै देशले एकअर्काका सामानमा लाग्ने उच्च कर शुल्क ९० दिनका लागि निलम्बन गर्ने निर्णय गरेका छन्। अमेरिकी राष्ट्रपति डोनाल्ड ट्रम्पले चिनियाँ आयातमा लगाइने शुल्क वृद्धिको मिति नोभेम्बर ९ सम्म सार्ने कार्यकारी आदेशमा हस्ताक्षर गरेपछि चीनले पनि सोही कदम चालेको हो।

चीनको सीमा शुल्क आयोगले अगष्ट १२ देखि लागू हुने गरी अमेरिकी सामानमा लाग्ने अतिरिक्त २४ प्रतिशत शुल्क निलम्बन गर्ने र बाँकी १० प्रतिशत दर कायम राख्ने जनाएको छ। यसअघि जिनेभा र लन्डनमा भएका बैठकमा भएका सहमतिहरू पुनः दोहोर्याउँदै दुवै पक्षले गैर-शुल्कीय प्रतिवन्धहरू हटाउने वा निलम्बन गर्ने प्रतिबद्धता जनाएका हुन् ।

सम्झौताअनुसार, चीनको वाणिज्य मन्त्रालयले गत अप्रिलमा निर्यात नियन्त्रण सूचीमा राखिएका अमेरिकी १६ संस्थामाथिको प्रतिबन्ध ९० दिनका लागि निलम्बन गर्ने र १२ संस्थामाथिको प्रतिबन्ध स्थायी रूपमा हटाउने निर्णय गरेको छ। यद्यपि, ती संस्थामा दोहोरो प्रयोजनका वस्तु निर्यात गर्न इच्छुक आपूर्तिकर्ताले अनुमति पत्रका लागि आवेदन दिनुपर्नेछ।

विशेषज्ञहरूले यो कदमलाई व्यापार तनाव कम गर्ने सकारात्मक प्रयास भनेका छन् तर यो अस्थायी मात्र भएको चेतावनी दिँदै दीर्घकालीन स्थिरताका लागि शुल्क पूर्ण रूपमा हटाउनुपर्ने सुझाव दिएका छन्।