प्रधानमन्त्री बेन्जामिन नेतान्याहूको गाजा सिटी नियन्त्रणमा लिने योजनाविरुद्ध येरुशलम लगायतका शहरहरूमा हजारौं मानिसले प्रदर्शन गरेका छन् ।

हमासद्वारा बन्दी बनाइएका व्यक्तिहरूका परिवारले आयोजना गरेका यी प्रदर्शनहरू युद्ध सुरु भएपछिका सबैभन्दा ठूला आन्दोलनमध्ये एक हो , जसले तत्काल युद्धविरामको माग गर्दै उक्त कदमले बन्दीहरूलाई अझै जोखिममा पार्ने र द्वन्द्व बढाउने चेतावनी दिएका छन्।

नेतान्याहूको मन्त्रिपरिषद्ले हालै “युद्ध समाप्त गर्ने” रणनीतिको रुपमा सम्पूर्ण गाजा क्षेत्र आफ्नो नियन्त्रणमा लिने प्रस्तावलाई पारित गरेपछि इजरायली नागरिकले सरकार विरोधी प्रदर्शन सुरु गरेका हुन्।

देशभित्र र बाहिरबाट यस कदमप्रति आलोचना बढेको छ, जसमा विपक्षी दल र पश्चिमी मुलुकहरू (अमेरिका बाहेक) समेत समावेश छन्। उनीहरूले यो कदमले मानवीय संकट र थप रगतपात निम्त्याउने चेतावनी दिएका छन्।

सन् २०२३ अक्टोबर ७ मा हमासको आक्रमणमा करिब १,२०० जना इजरायली, मारिएका थिए र २५१ जनालाई गाजामा लगेर बन्दी बनाइएका थिए। तीमध्ये करिब ५० जना अझै बेपत्ता छन् र करिब २० जना मात्र जीवित रहेको विश्वास गरिन्छ। जबकि इजरायलको आक्रमणमा परी ६१००० बढी प्यालेस्टिनी नागरिकको मृत्यु भएको छ भने ५० हजार बढी घाइते भएका छन् भने लाखौँले आफ्नो भुमि त्यागेर भागेका छन्।