काठमाडौँ — संघीय संसदअन्तर्गतका चार फरक समितिहरूको बैठक आज निर्धारित कार्यतालिका अनुसार बस्ने भएका छन्। बैठकमा अर्थ समिति, कानुन, न्याय तथा मानवअधिकार समिति, कृषि, सहकारी तथा प्राकृतिक स्रोत समिति, र विधायन व्यवस्थापन समिति रहेका छन्।

अर्थ समितिले ‘वैकल्पिक विकास वित्त परिचालनका सम्बन्धमा व्यवस्था गर्न बनेको विधेयक’माथि दफावार छलफल गर्नेछ।

कानुन, न्याय तथा मानवअधिकार समितिमा ‘नेपाल कानुन व्यवसायी परिषद् (दोस्रो संशोधन) विधेयक, २०८१’ विषयमा दफावार छलफल हुनेछ।

कृषि, सहकारी तथा प्राकृतिक स्रोत समितिले ‘हिन्द कुश हिमालयन पार्लियामेन्टस् मिट–२०२५’ सम्बन्धी एजेन्डामा छलफल गर्नेछ।

त्यसैगरी, विधायन व्यवस्थापन समितिले ‘नेपाल नागरिकता (दोस्रो संशोधन) विधेयक, २०८१’ सम्बन्धमा सैद्धान्तिक छलफल गर्नेछ।