अन्तर्राष्ट्रिय समुदायको चर्को आलोचना र चेतावनीको बाबजुद इजरायली अधिकारीहरूले कब्जामा रहेको वेस्ट बैंकमा अवैध बस्तीहरू विस्तार गर्ने योजना अघि बढाएका छन्। यो कदमले दुई-राष्ट्र समाधानको सम्भावनालाई थप समाप्त पार्ने चेतावनी दिइएको छ।

इजरायली सरकारले पूर्वी यरुशलमको पूर्वी क्षेत्रको विकासबारे निर्णय गर्न बुधबारको मिति तोकेको थियो । योजनाअनुसार त्यहाँ हजारौं नयाँ आवास युनिटहरू निर्माण गरिनेछ, जसले अवैध रूपमा स्थापित ठूलो बस्ती म’आले अदुमिमलाई यरुशलमसँग जोड्नेछ। यसले वेस्ट बैंकलाई दुई भागमा विभाजित गर्दै प्यालेस्टिनी समुदायहरूलाई अलग्याउनेछ।

इजरायली प्रधानमन्त्री बेन्जामिन नेतन्याहूको दक्षिणपन्थी सरकारले अहिले गाजालाई पूर्णरूपमा कब्जा गर्ने संकेत पनि दिइरहेको छ, जहाँ अहिले निरन्तर आक्रमण भइरहेको छ।

अन्तर्राष्ट्रिय कानुनअनुसार वेस्ट बैंक र पूर्वी यरुशलममा रहेका इजरायली बस्तीहरू अवैध मानिन्छन्। संयुक्त राष्ट्रसंघको सर्वोच्च अदालत, (अन्तर्राष्ट्रिय न्याय अदालत)ले गत वर्ष पनि इजरायलको उपस्थिति अवैध भएको पुनः पुष्टि गरेको थियो र कब्जा अन्त्य “जति सक्दो छिटो” गर्नुपर्ने बताएको थियो।

यस योजनाअन्तर्गत १,२१४ हेक्टर (झण्डै ३,००० एकड) प्यालेस्टिनी जमिन कब्जा गरेर ४,००० भन्दा बढी बस्ती युनिटहरू, होटलहरू र म’आले अदुमिमलाई पश्चिम यरुशलमसँग जोड्ने सडकहरू बनाइनेछ।

प्यालेस्टिनी नेताहरूका अनुसार यो योजना पूर्वी यरुशलमलाई “यहूदीकरण” गर्ने र कब्जा गरिएको क्षेत्रमा इजरायली नियन्त्रण अझै बलियो बनाउने दीर्घकालीन प्रयासको हिस्सा हो।

प्यालेस्टिनीहरू भविष्यमा बन्ने स्वतन्त्र राज्यका लागि वेस्ट बैंक, गाजा स्ट्रिप र राजधानीको रूपमा पूर्वी यरुशलम चाहन्छन् – यी सबै क्षेत्रहरू इजरायलले १९६७ को युद्धमा कब्जा गरेको थियो।

हाल वेस्ट बैंकमा ५ लाखभन्दा बढी इजरायली बासिन्दा छन्, र पूर्वी यरुशलममा झण्डै २.२ लाख बसोबास गरिरहेका छन्।