काठमाडौँ- दक्षिण कोरियाको रोजगारी अनुमति प्रणाली ईपीएस अन्तर्गत २०२५ का लागि कोरियन भाषा परीक्षाको आवेदन प्रक्रिया नेपाली कामदारका लागि आगामी अगस्ट ११ देखि सुरु हुने भएको छ। आवेदन दिने म्याद अगस्ट १६ सम्म तोकिएको छ।

नेपालको वैदेशिक रोजगार विभागअन्तर्गतको ईपीएस शाखाले सार्वजनिक सूचना जारी गर्दै काठमाडौंमा सञ्चालन हुने पहिलो चरणको भाषा परीक्षाका लागि आवेदन आह्वान गरेको हो। यो चरण सफल हुने उम्मेदवारहरूले दक्षिण कोरियाको उद्योग र पशुपालन क्षेत्रमा रोजगारी पाउनेछन्।

यस चरणमा ५,३०० नेपाली कामदार भर्ना गर्ने लक्ष्य लिइएको छ। जसमा ३,५०० जना उद्योग क्षेत्रमा र १,८०० जना पशुपालन क्षेत्रमा छनोट गरिनेछन्।

सूचनामा भनिएको छ कि मागको आधारमा यो संख्या घटबढ हुन सक्नेछ। १८ वर्षदेखि ३९ वर्ष उमेर समूहका नेपाली नागरिकहरू मात्र भाषा परीक्षामा सहभागी हुन योग्य हुनेछन्। एक जनाले एकै क्षेत्रको लागि मात्र आवेदन दिन सक्नेछ।

आर्थिक वर्ष २०८१/८२ मा मात्रै १४,२२४ नेपालीले कोरियाका लागि श्रम स्वीकृति लिएका छन्। हालसम्म १ लाख १० हजारभन्दा बढी नेपाली कोरिया गइसकेका छन् भने ५० हजार जति हाल कोरियामै कार्यरत छन्।

दक्षिण कोरियाले सन् २००७ मा नेपाल सरकारसँग ईपीएस प्रणालीमार्फत श्रमिक पठाउने सम्बन्धमा सम्झौता गरेको थियो र सन् २००८ देखि नियमित रूपमा प्रक्रिया सञ्चालन हुँदै आएको छ।