बेलायती प्रधानमन्त्री कीयर स्टार्मरले इजरायलले गाजामा भइरहेको मानवीय संकट अन्त्य गर्न तत्काल र ठोस कदम नचालेमा बेलायतले प्यालेस्टिनलाई स्वतन्त्र राष्ट्रको रूपमा मान्यता दिने घोषणा गरेका छन्। यो बयान बेलायतको परम्परागत मध्यपूर्व नीति विरुद्ध एक महत्वपूर्ण मोडको रूपमा हेरिएको छ, विशेष गरी जब फ्रान्सले यसै सेप्टेम्बरभित्र प्यालेस्टिनको मान्यता दिने योजना सार्वजनिक गरिसकेको छ।

डाउनिङ स्ट्रिटबाट जारी वक्तव्यमा प्रधानमन्त्री स्टार्मरले भने, “गाजाको अवस्थालाई अब बेवास्ता गर्न सकिन्न। इजरायलले यदि पूर्ण युद्धविराम र दीर्घकालीन शान्ति प्रक्रिया तर्फ प्रतिबद्धता देखाएन भने, बेलायतलाई निर्णायक कदम चाल्न बाध्य बनाइनेछ।” उनले गाजामा जारी बमबारी र आमनागरिकको दु:खद अवस्थालाई ‘असहनीय’ भन्दै तत्काल शान्ति कायम गर्न आह्वान गरे।

यसअघि फ्रान्सेली राष्ट्रपति इम्यानुएल म्याक्रोनले पनि इजरायलले युद्द अन्त्य नगरेमा सेप्टेम्बरसम्म प्यालेस्टिनलाई स्वतन्त्र राज्यको मान्यता दिने बताएका थिए। बेलायत र फ्रान्सजस्ता युरोपेली शक्तिहरूले एउटै धारमा यस्ता कूटनीतिक चेतावनी दिँदा इजरायलमाथि दबाव झनै तीव्र बनेको छ।

इजरायलको दीर्घकालीन मित्रराष्ट्र मानिने युरोपेली मुलुकहरूले अब उसमाथि आलोचना गर्न थालेको यस कदमलाई ऐतिहासिक मोडको रूपमा हेरिएको छ। यदि यी मुलुकहरूले प्यालेस्टिनलाई मान्यता दिए, भने यसले इजरायललाई कूटनीतिक धक्का पुर्‍याउनुका साथै प्यालेस्टिनहरूका लागि ठूलो राजनीतिक जीत हुने सम्भावना छ।

अब इजरायलले यस चेतावनीलाई गम्भीर रूपमा लिन्छ वा प्रतिरोधको बाटो रोज्छ भन्ने कुरा समयले देखाउनेछ। तर युरोपबाट आएको सन्देश स्पष्ट छ — अन्ध समर्थनको युग अब समाप्त हुँदैछ।