सन् २०२३ को अक्टोबरदेखि गाजामा सुरु भएको युद्धपछि अहिलेसम्म इजरायली सेनाद्वारा कम्तीमा ६०,०३४ प्यालेस्टिनीको ज्यान गएको गाजाको स्वास्थ्य मन्त्रालयले जनाएको छ।

यो भयावह तथ्यांक मंगलबार सार्वजनिक गरिएको हो। मंगलबार मात्रै बिहानैदेखि कम्तीमा ६२ जना प्यालेस्टिनी मारिएका छन्।

यसैबीच, भोकमरीको “सबैभन्दा खराब अवस्था” गाजामा देखा परिरहेको अन्तर्राष्ट्रिय भोकमरी अनुगमन प्रणाली आइपिसीको पछिल्लो प्रतिवेदनले जनाएको छ।

“गाजा क्षेत्रको अधिकांश भागमा खाद्य उपभोगका लागि भोकमरीको स्तरमा पुगिसकेको छ, र गाजा सहरमा गम्भीर कुपोषणको अवस्था कायम भइसकेको छ,” प्रतिवेदनमा उल्लेख गरिएको छ।

“निरन्तर द्वन्द्व, व्यापक विस्थापन, मानवीय सहायता प्रवेशमा अत्यधिक प्रतिबन्ध, र स्वास्थ्य सेवाजस्ता अत्यावश्यक सेवाकोप्रतिबन्धकाबिच संकट अब गम्भीर र प्राणघातक मोडमा पुगेको छ,” रिपोर्टले चेतावनी दिएको छ।

खाद्य उपभोगमा तीव्र गिरावट आएको छ, जसमा प्रत्येक तीनमध्ये एक व्यक्तिले दिनौंसम्म खाना नपाएको अवस्था देखिएको छ।

जुलाई महिनाको पहिलो भागमा कुपोषण तीव्र गतिमा बढेको र अप्रिलदेखि मध्य जुलाईसम्म २०,००० भन्दा बढी बालबालिकालाई गम्भीर कुपोषणको उपचारका लागि अस्पतालमा भर्ना गरिएको उल्लेख गरिएको छ। तीमध्ये ३,००० भन्दा बढी बालबालिका गम्भीर रूपमा कुपोषित छन्।

यो भोकमरी संकट गाजाको सबै वर्गमा गहिरिएर फैलिएको छ। युएन वोमेनकी कार्यकारी निर्देशक सिमा बहोसका अनुसार गाजाका १० लाख महिला र किशोरीहरूले “भोकै मर्ने वा खाना खोज्दा ज्यानको जोखिम उठाउने” असम्भव विकल्पको सामना गरिरहेका छन्।

“यो भयावहता अब अन्त्य हुनुपर्छ,” बहोसले सामाजिक सञ्जालमा लेख्दै भनिन्। उनले गाजामा अवरुद्ध मानवीय सहायता सहजरूपमा प्रवेश गराउन, बन्धकको रिहाइ गर्न र स्थायी युद्धविराम गर्न आह्वान गरेकी छन्।