काठमाडौँ- एमालेले पार्टी राजनीतिमा आउन रोक लगाएपछि र पार्टी सदस्यता समेत खारेज गरिदिएको विषयमा पूर्वराष्ट्रपति विद्यादेवी भण्डारीले पत्रकार सम्मेलन नै आयोजना गरेर आफ्ना कुराहरु सार्वजनिक गरेकी छन्।

पत्रकार सम्मेलनमा उनले आफू राष्ट्रकै सर्वोच्च पदमा पुगेकाले अब पदको कुनै आशक्ति नभएको तर आफू राजनीतिमा आएर देश र जनताको सेवा गर्न चाहेको विषयलाई अनौठो नमान्न आग्रह गरेकी छिन् ।

भण्डारीले आफूले राष्ट्रपति हुँदा नै पार्टी सदस्यता लिएको ३४ वर्ष भइसकेको उल्लेख गर्दै अहिले ४५ वर्ष पुगेको र आफूलाई नेकपा (एमाले) को पार्टी सदस्यताबाट वञ्चित गर्नुपर्ने कुनै कारण नरहेको भन्दै आफुले पार्टीको सदस्यता विधिपूर्वक नवीकरण गरेको समेत स्पष्ट पारेकी छन्। आफुले पार्टीको सदस्यता लिँदा मदनभण्डारी कोसी-सगरमाथा इन्चार्ज भएको कुरा स्मरण गर्दै पार्टीको सदस्यता लिएको ४५ वर्ष पुगिसकेको र आज आएर कसैलाई लाग्यो भन्दैमा मेरो सदस्यता फाल्न नसक्ने र नमिल्ने उनले बताएकी छन।

“पार्टी हजारौँ सदस्यको रगत-पसिनाले बनेको हो म यो कुरा कुनै भावनामा भनिरहेको छैन। जबजले अगाडि सारेको पार्टी निर्माणमा अघि बढ्न देशभरका एमाले कार्यकर्तालाई आह्वान गर्छु म मेरो कुरामा विचलित हुने छैन,’ उनले भनिन्, ‘निर्धक्क ढुक्क भएर रहन आग्रह गर्छु । जननेता मदन भण्डारीले उठाएका कुरा र जबजले नै एमाले मुलुकको स्थायी शक्ति बन्न सक्छ।’

उनले पार्टीलाई थप सशक्त बनाउनु अबको दायित्व भएको पनि बताइन्।