इजरायली आक्रमणले गिजोलेको गाजा पट्टीमा भोकमरीको लहर चलिरहेको संयुक्त राष्ट्र संघिय स्वास्थ्य अधिकारीहरूले बताएका छन्। भोकमरीको लहरसँगै थप १० जना प्यालेस्टिनीको मृत्यु भएको छ।

इजरायलले युद्ध सुरु गरेदेखि भोकमरीले मृत्यु हुनेको संख्या १११ पुगेको छ, जसमध्ये धेरैजसो हालैका हप्ताहरूमा भएका छन्।गाजाको स्वास्थ्य मन्त्रालयका अनुसार विगत २४ घण्टामा इजरायली आक्रमणमा कम्तिमा १३४ जना प्यालेस्टिनीहरू मारिएका छन्।

विश्व स्वास्थ्य संगठन (डब्लुएचओ) ले गाजामा यस वर्ष अहिलेसम्म भोकमारीबाट मृत्यु हुनेहरूमा पाँच वर्ष मुनिका २१ बालबालिका रहेको बताएको छ।

मर्सी कोर्प्स, नर्वेजियन शरणार्थी परिषद् र शरणार्थी इन्टरनेशनल लगायत १११ संस्थाहरूले एक विज्ञप्तिमा भनेका छन् कि गाजा बाहिर सिमानामा टनका- टन खाना र सफा पानी छन् तर ति सबैको आपूर्ति अवरुद्ध हुँदा “सामूहिक भोकमरी” फैलिरहेको छ। सहायता गर्न पुगेका समूहहरूलाई इजरायली सेनाले सहायता वितरणमा रोक लगाएको छ।

संयुक्त राष्ट्र संघ र गाजामा खाना पुर्‍याउन खोजिरहेका सहायता समूहहरूका अनुसार सहायता वितरण केन्द्रहरु नजिकै इजरायली सेनाले सयौं प्यालेस्टिनीहरूलाई गोली हानी मारेको छ।

युद्दको सुरुवातदेखि हालसम्म इजरायली आक्रमणमा परि साठी हजार भन्दा बढी प्यालेस्टिनी नागरिकको मृत्यु भएको छ भने, दश लाख भन्दा बढीले आफ्नो घरबार छाडेर भागेका छन्।