काठमाडौँ — एमाले केन्द्रीय कमिटी बैठकमा केन्द्रीय सदस्य उषाकिरण तिम्सेनाले अध्यक्ष केपी शर्मा ओलीले नेतृत्व हस्तान्तरण गर्नुपर्ने माग राखेकी छन्।

ओली कमरेडले दुई कार्यकाल अध्यक्ष चलाइसक्नु भयो, अब निसर्त नेतृत्व हस्तान्तरण र पुस्तान्तरणको समय हो भन्दै व्यक्ति विशेषलाई हेरेर विधान बदल्नुभन्दा संगठनलाई बलियो बनाउने गरी विधान बनाउनुपर्ने समेत तिम्सेनाले बताएकी छन्।

‘सधैँ पार्टी घेराबन्दीमा पर्‍यो-पर्‍यो भनिन्छ, पार्टी सरकारमा हुँदा पनि घेराबन्दीमा, प्रतिपक्षमा हुँदा पनि घेराबन्दी कसरी हुन्छ ? यो घेराबन्दी तोड्न हाम्रो यति ठूलो संगठनात्मक शक्ति भएको एमालेले किन नसकेको हो ?,’ उनको प्रश्न थियो,

‘हामी मिसन ८४ भनिरहेका छौँ, यो हलमा भएका कम्तीमा एक तिहाइले राज्यसत्ताको अभ्यास गरिरहेका छौँ अनि जनतालाई ८४ देखाएर हुन्छ ? आज हामी के गर्दैछौँ ? भन्ने कुरा मुख्य होइन र ?’