काठमाडौं : नेकपा एकीकृत समाजवादीका अध्यक्ष माधव नेपालले नेकपा एमालेसँग पार्टी एकताको कुनै सम्भावना नरहेको बताएका छन्। शुक्रबार एकीकृत समाजवादी र एकता राष्ट्रिय अभियानबीच एकता कार्यक्रममा बोल्दै उनले एमालेसँग एकताको कुनै सम्भावना नरहेको प्रष्ट पारेका हुन्।

अध्यक्ष नेपालले भने,‘त्यहाँभित्रको अवस्था हामीले देखेका छौँ। कसैको लसपस छ भने आसाअपेक्षा छ भने मेरो भन्नु केही छैन। तर यो पार्टीसँग उसको सम्बन्धको कुरा गर्नु हुन्छ भने उसका नेताको अभिव्यक्तिले नै प्रष्ट पारिसकेको छ कि यो पार्टीलाई कसरी सिद्ध्याउने, यो पार्टीलाई कसरी समाप्त पार्ने। त्यसका लागि कुन–कुन तरिका अपनाउने, कहाँ प्रहार गर्ने यी सबै कुरा उनीहरूले भनिरहेको गरिरहेकोबाट हामीले बुझिसकेको छौँ।’

अध्यक्ष नेपालले कुनै पनि हिसाबले एमालेसँग पार्टी एकताको भ्रममा नपर्न आग्रह गरेका छन्। उनले एकता राष्ट्रिय अभियानसँगको एकताले पार्टीलाई बलियो बनाउन कसैले राेक्न नसक्ने बताए।