काठमाडौँ- नेकपा एकीकृत समाजवादी पार्टी र नेकपा एकता राष्ट्रिय अभियानबिच पार्टी एकता भएको छ । एकीकृत समाजवादीका अध्यक्ष माधवकुमार नेपाल र एकता अभियानका संयोजक वामदेव गौतमलगायत नेताहरूबिच भएको छलफलबाट पार्टी एकता गरिएको हो।

गौतमलाई नेकपा एकीकृत समाजवादीमा तेस्रो वरीयताका साथै वरिष्ठ नेताको पद पनि दिइने भएको छ । अब पार्टीमा अध्यक्ष माधवकुमार नेपाल, सम्मानित नेता झलनाथ खनाल र वरिष्ठ नेताका रुपमा वामदेव गौतम हुनेछन् ।

पार्टी एकता कार्यक्रम राष्ट्रिय सभागृहमा भएको थियो । दुवै पक्षका नेताहरुले पार्टी एकतालाई वामपन्थी एकताका लागि महत्वपूर्ण योगदान गर्ने बताएका छन् ।

राजनीतिक दर्शन, सिद्धान्त, कार्यक्रम, रणनीत र कार्यदिशामा एकरूपता रहेकाले नेपालको कम्युनिस्ट आन्दाेलनकाे एकता अपरिहार्य रहेको दुवै पार्टीको नेताहरुले बताएका छन्।