इरानले अन्तर्राष्ट्रिय आणविक ऊर्जा एजेन्सी (आइएइए ) लाई आफ्नो आणविक केन्द्रहरूको निरिक्षण गर्नबाट रोक लगाएको छ। तेहरानले हालैको प्रतिवेदनमा उक्त एजेन्सीले तथ्यहरूलाई तोडमोड गरेको आरोप लगाउंदै इस्लामिक गणतन्त्र विरुद्ध हालै इजरायली र अमेरिकी आक्रमणहरूको उदेश्य र आइएइएको औचित्यमा प्रश्न गरेको छ।

स्थानीय मिडिया आउटलेट मेहरले उद्धृत गरेअनुसार इरानी संसदका उपाध्यक्ष हमिद रेजा हाजी बाबेईले शनिबार घोषणा गरे कि तेहरानले अब प्रमुख राफेल ग्रोसी लगायत आइएइएका कर्मचारीहरूलाई व्यक्तिगत रूपमा आफ्नो आणविक केन्द्रहरूको निरीक्षण गर्न अनुमति दिने छैन।

यस हप्ताको सुरुमा, इरानको संवैधानिक निगरानी निकाय, गार्जियन काउन्सिलले इरानलाई आफ्नो आणविक केन्द्रहरूको सुरक्षा ग्यारेन्टी नदिएसम्मआइएइएसँगको सहयोग निलम्बन गर्ने कानूनलाई अनुमोदन गरेको छ।

वर्षौंदेखि तेहरानले गोप्य रूपमा आणविक हतियार कार्यक्रम विकास गरिरहेको दाबी गर्दै आएको इजरायलले जुन १३ मा इरान विरुद्ध उसको धेरै आणविक केन्द्रहरू र आणविक कार्यक्रममा संलग्न रहेको विश्वास गरिएका धेरै वरिष्ठ सैन्य कमाण्डरहरू र वैज्ञानिकहरूलाई लक्षित गर्दै ठूलो हवाई आक्रमण सुरु गरेको थियो ।

इरानले आफ्नो आणविक कार्यक्रम पूर्ण रूपमा शान्तिपूर्ण प्रकृतिको भएको दाबी गरेको छ।