काठमाडौँ — राष्ट्रिय स्वतन्त्र पार्टीका सांसद मनिष झाले भिजिट भिसा र मानव बेचबिखनको सङ्गठित अपराधमा संलग्नहरूको छानबिनका लागि आफूहरूले राखेको मागबाट पछि नहट्ने स्पष्ट पारेका छन् ।

मंगलबार नयाँ बानेश्वरस्थित संघीय संसद् भवनमा पत्रकारहरूसँग कुराकानी गर्दै सरकारले ल्याउन लागेका विधेयकहरूको महत्त्व आफूहरूले बुझेको र विधेयकहरूमा राजनीतिक समर्थन गर्न तयार रहेको तर सरकारले पनि आफूहरूको मागहरु सुन्नुपर्ने उनले बताएका छन् । उनले भिजिट भिसा प्रकरणमा जोडिएकाहरूको छानबिनका लागि उच्चस्तरीय छानबिन आयोग, न्यायिक समिति वा संसदीय विशेष छानबिन समिति गठन गर्नुपर्ने अडान राख्दै आएका छन्।

भिजिट भिसा प्रकरणमा गृहमन्त्री रमेश लेखकको नामसमेत जोडिएपछि राष्ट्रिय स्वतन्त्र पार्टीले गृहमन्त्रीको राजीनामा र छानबिन समितिको माग राख्दै लगातार संसद अवरोध गर्दै आएको छ।