काठमाडौं – संघीय संसदको बैठकलाई सम्बोधन गर्दै प्रमुख प्रतिपक्ष दल माओवादीका अध्यक्ष पुष्पकमल दाहाल प्रचण्डले सरकारले लिएर आएको सामाजिक सञ्जाल विधेयकले नागरिकको अभिव्यक्तिलाई अपराधको श्रेणीमा राखेको भन्दै बोलेको भरमा नागरिकलाई हत्कडी लगाएर सरकारले अभिव्यक्ति स्वतन्त्रता र प्रेस स्वतन्त्रतालाई हस्तक्षप गर्न खोजेको बताएका छन्।

रचनात्मक आलोचना समेत सहन नसक्ने प्रधानमन्त्रीले सामजिक संजाल नियमनको नाममा नागरिक र प्रेस स्वतन्त्रता हस्तक्षप गर्न खोजेको उनले बताएका छन्।

बोलेको भरमा नागरिकलाई हत्कडी लगाएर जिल्ला जिल्ला घुमाएर नागरिकको अभिव्यक्ति स्वतन्त्रतासंग डराएको सरकारले,आफुले आफैलाई सफल घोषणा गरेर संसद र जनता झुक्याउन तिर लागेको समेत बताएका छन्।

नागरिकको अभिव्यक्ति स्वतन्त्रा खोस्नु र प्रेस स्वतन्त्रतामाथि अंकुश लगाउनु प्रधानमन्त्री ओलीको लागि नौलो कुरा नभएको र यसअघिको सरकारमा पनि उनले त्यो प्रयास गरेको, तर हिजो प्रतिपक्षमा छँदा सामाजिक सञ्जाल विधेयकको विरोध गरेको नेपाली काँग्रेस किन र के कारणले ओलिपथमा लागेको भनेर प्रश्न समेत गरेका छन्। “के हो यो सामाजिक सञ्जाल नियमन विधेयक ? के हो यसमा नेपाली कांग्रेसको आधिकारिक धारणा ? हिजो त तपाईंहरु यसको विपक्षमा उभिनुभएको थियो । आज कता हुनुहुन्छ ? तपाईहरु सत्ताका लागि मात्रै सहकार्यमा हुनहुन्छ कि राजनीतिक दृष्टिकोणमैं परिवर्तन आइसकेको हो ? कि कांग्रेसलाई पनि ओलीजीलाई जस्तै प्रश्नमुक्त र विवेकमुक्त नेपाल चाहिएको हो ? के हो तपाईहरुको वैचारिकी ?”,उनले प्रश्न गरेका छन्।