काठमाडौँ- म्याग्दीको बेनीमा रहेको कुमारी सहकारी संस्थाको डेढ अर्ब रुपैयाँ हिनामिनाको आरोप लागेका जिल्ला समन्वय समिति म्याग्दीका प्रमुख राजकुमार थापालाई प्रहरीले पक्राउ गरेको छ।

सहकारी रजिष्ट्रारको कार्यालय पोखराले एक वर्ष अघि गरेको छानविन प्रतिवेदनमा थापाको योजनामा कुमारी सहकारी संस्थाको डेढ अर्ब रुपैयाँ हिनामिना भएको र थापा सहितको टोलीले उक्त रकम निजी विद्यालय, घर जग्गा खरिद कार्यमा लगाएर दुरुपयोग गरेको पाइएको उल्लेख गरिएको छ ।

०७९ साल माघ २८ गते सहकारीका अध्यक्ष यमबहादुर रोक्का समेतले सहकारी रजिष्ट्रारको कार्यालयमा लिखित निवेदन दिएर कुमारी बहुउद्देश्यीय सहकारीको रकम छानविन गर्न माग गर्दै आएको भएपनि थापालाई अहिलेसम्म पक्राउ गरिएको थिएन। उनि एमालेबाट जिसस प्रमुख निर्वाचित भएका थिए।