काठमाडौँ- नेपाल बारको कार्यसमिति बैठकले देशभरका कानुन व्यवसायीहरूको छाता संगठन नेपाल बार एसोसिएसनको नयाँ नेतृत्वका लागि आगामी चैत २३ गते निर्वाचन गर्ने निर्णय गरेको छ।

अध्यक्ष गोपालकृष्ण घिमिरेका अनुसार बैठकले वरिष्ठ अधिवक्ता रामकृष्ण निरालाको अध्यक्षतामा ५ सदस्यीय निर्वाचन समिति समेत गठन गरेको छ भने आगामी निर्वाचनबाट नेपाल बारले २७ ‍औँ कार्यसमिति चयन गर्नेछ।

नेपाली कांग्रेस र नेकपा एमालेनिकट संगठनहरू नेतृत्वका मुख्य दाबेदार रहँदै आएकोमा वर्तमान सरकार काँग्रेस र एमालेको संयुक्त सरकार भएकोले बारको आगामी निर्वाचन गठबन्धनको समीकरण अनुसार अगाडी बढ्न सक्ने अनुमान गरिको छ।

हालै सर्वोच्च अदालत बार एसोसिएनमा कांग्रेस र एमालेनिकट संगठनबीच भएको चुनावी प्रतिष्पर्धामा कांग्रेस निकट संगठन डेमोक्रेटिक लयर्स एसोसिएसनका उम्मेदवार मेघराज पोखरेल अध्यक्षमा निर्वाचित भएका थिए।

यसअघि २०७८ चैतमा भएको बारको चुनावमा नेपाली कांग्रेस, माओवादी र एकीकृत समाजवादीको गठबन्धनबाट हालका अध्यक्ष गोपालकृष्ण घिमिरेको प्यानल विजयी भएको थियो।

नेपाल बारमा प्रत्येक ३ वर्षमा नेतृत्व चयनका लागि निर्वाचन हुने गर्दछ ।