काठमाडौं – ताप्लेजुङको पाथिभरामा केबलकार निर्माणको प्रक्रिया रोक्न स्थानीयले माग गर्दै आएको र सो क्रममा स्थानीयले अवरोध गर्दा भएको झडपमा प्रहरीले गोलि प्रहार गर्दा ३ जना घाइते भएको घटनालाई लिएर छलफल गर्न गृहमन्त्री रमेश लेखकले ताप्लेजुङ, पाँचथर, इलाम र धनकुटाका सांसदहरुलाई छलफलमा बोलाएका छन् ।

‘नो केबलकार अभियान’को नामबाट सोमबार प्रदर्शनमा उत्रिएका स्थानिय र प्रहरीबीच झडप हुँदा स्थितिलाई नियन्त्रणमा लिन प्रहरीले गोलि चलाउँदा तिन जना स्थानिय घाइते भएका थिए। उनीहरुलाई उपचारका लागि हेलिकप्टरबाट काठमाडौं ल्याएको छ ।

प्रहरीले दमन गरेको भन्दै विरोधमा उत्रिएकाहरुले आज मेची राजमार्ग, तमोर करिडोर बन्द आह्वान गरेका छन् । मुक्कुमलुङ संरक्षण र केबलकार खारेजी संघर्षरत संस्थाका प्रतिनिधिहरुले माघ १५ गतेदेखि अनिश्चितकालीन बन्दको आह्वान समेत गरेका छन्।