काठमाडौं – प्रधानमन्त्रीको सरकारी निवास बालुवाटारमा बसेको सत्ता साझेदार दलहरुको बैठकले संसद्का एजेण्डाहरुमा साझा मत प्रस्तुत गर्ने र संसदमा एक भएर प्रस्तुत हुने निर्णय गरेको छ।

बैठकमा प्रधानमन्त्री केपी शर्मा ओलीले सरकार सञ्चालनबारे ब्रिफिङ गर्दै संसदमा सत्तारुढ दलका सबै मिलेर जानुपर्ने बताएका छन्। बैठकले यही माघ १८ गते सुरू हुने संसदको हिउँदे अधिवेशनलाई प्रभावकारी बनाउन एउटै आवाज उठाउने निर्णय गरेको एमालेका प्रमुख सचेतक महेश बर्तौलाले जानकारी दिए।

सरकार र सत्तारुढबीच समस्या नरहेको निष्कर्षपछि संसद् बैठकमा पनि एउटै मत बनाएर जाने निर्णय गरिएको बैठकमा सहभागी नेताहरुले बताएका छन् ।