मेक्सिकोले निर्वासन गरिएका अवैध आप्रवासीहरूलाई बोकेको अमेरिकी सैन्य विमानलाई आफ्नो भूभागमा अवतरण गर्न अनुमति दिन अस्वीकार गरेको छ।

सोमबार पदभार ग्रहण गरेपछि, अमेरिकी राष्ट्रपति डोनाल्ड ट्रम्पले दक्षिणी सीमामा आपतकाल घोषणा गर्दै अवैध आप्रवासीहरूको निर्वासनलाई तीव्र पार्ने वाचा गरेका थिए ।

अज्ञात संख्यामा आप्रवासीहरू बोकेको सी-१७ सैन्य विमान मेक्सिकोमा अवतरण गर्ने तालिका रहेपनि मेक्सिकोले उक्त जाहाजलाई आफ्नो भूमिमा अवतरण अनुमति नदिएपछि अवैध आप्रवासी बोकेको उक्त जाहाजले उडान नै नभरेको बताइएको छ।

लगभग ८० आप्रवासीहरू बोकेको ग्वाटेमालाका लागि दुई समान विमानहरुले भने शुक्रबार योजना अनुसारनै उडान भरेको बताइएको छ ।

मेक्सिकन अधिकारीका अनुसार अमेरिकी विमानलाई देशमा अवतरण गर्न अनुमति दिइएको थिएन तर किन दिइएन भन्ने विषयमा भने उनले कुनै कारण उल्लेख नगरेको बताइएको छ।

मेक्सिकन विदेश मन्त्रालयले शुक्रबार एक विज्ञप्तिमा विमानलाई देशमा अवतरण गर्न किन रोक लगाइएको थियो भनेर उल्लेख नगरेपनि “मेक्सिकोको अमेरिकी सरकारसँग धेरै राम्रो सम्बन्ध रहेको र आफुहरु आप्रवासन सहित विस्तृत मुद्दाहरूमा आफ्नो सार्वभौमिकताको सम्मान गर्दै सहयोग गर्ने बताएको छ ।”

“जब स्वदेश फिर्तीको कुरा आउँछ, हामी सधैं खुला हातले हाम्रो क्षेत्रमा मेक्सिकनहरूको आगमनलाई स्वागत गर्नेछौं,” मन्त्रालयले भन्यो।

ट्रम्पको आदेश अन्तर्गत, पेन्टागनले पहिले दक्षिणी सीमा एजेन्टहरूलाई आप्रवासीहरूको निगरानी गर्न मद्दत गर्न १,५०० थप सैनिकहरू पठाएको थियो।

नयाँ अमेरिकी राष्ट्रपतिले मेक्सिकन लागूपदार्थ कार्टेलहरूलाई पनि आतंकवादी संगठन घोषणा गरेका छन्, मेक्सिकोको खाडीलाई अमेरिकाको खाडी नामकरण गरेका छन्, र अर्को महिनादेखि मेक्सिकन सामानहरूमा २५% कर लगाउने चेतावनी समेत दिएका छन्।