काठमाडौँ- नेकपा एकता राष्ट्रिय अभियानका संयोजक वामदेव गौतमलाई पार्टीमा तेस्रो वरीयतासहित वरिष्ठ नेता बनाउने र महासचिव डीबी कार्कीलगायत कम्तीमा ४ नेतालाई स्थायी कमिटीमा ल्याउने गरि एकीकृत समाजवादीले पदको बाँडफाँट गरेकोमा गौतमले आफ्ना १७ जनालाई केन्द्रीय सदस्य बनाउनुपर्ने माग राखेपछि एकीकृत समाजवादीका अध्यक्ष माधवकुमार नेपाल र बामदेव गौतमबिच पार्टीभित्र पद र संख्याको बाँडफाँडलाई लिएर अन्तिम गृहकार्य चलिरहेको बेला माघ ५ गते एक्कासी बामदेव गौतमले आफु पुरानै पार्टी एमालेमा फर्किन लागेको बताएका छन्।

अध्यक्ष माधव नेपाल र झलनाथ खनालपछि तेस्रो वरीयतामा वामदेव गौतम रहनेगरि एकीकृत समाजवादिमा पदीय बाँडफाँडको विषयमा अन्तिम टुङ्गो लाग्दै गर्दा गौतमले एमालेमा फर्किने निर्णय गर्दै एकाएक युटर्न लिएपछी यतिबेला एकीकृत समाजवादीका नेताहरु अन्यौलमा देखिएका छन्। तर माधव नेपालसँग केन्द्रीय सदस्यको संख्यामा कुरा नमिलेपछि गौतम एमालेमा फर्किन लागेको गौतम निकटका नेताहरुले बताएका छन्।

एमाले अध्यक्ष ओली र गौतमबीच माघ ४ गते बालुवाटारमा भेटभएपछी वामदेवले आफु एमालेमा फर्किन तयार भएको बताइएको छ। यधपी एमालेमा उनको पद र वरीयता के हुने हो भन्नेकुराको टुङ्गो भने अहिलेसम्म लागिसकेको छैन।

तर पनि वामदेव निकटका नेताहरुले भने एमाले अध्यक्ष ओलीले गौतमलाई एकीकृत समाजवादिमा भन्दा राम्रो जिम्मेवारी दिने बताएपछि उनि पुरानै पार्टीमा फर्किन तयार भएको बताएका छन्। साथै गौतम पक्षका नेता कार्यकर्ताहरुको पनि पार्टीमा उचित व्यवस्थापन हुनेगरि ओलीले प्रतिबद्दता जनाएको पनि उनीहरुले बताएका छन्।

यता, वामदेवलाई भित्र्याउने कुराले एमालेका केही पदाधिकारी भने खुसी देखिंदैनन । गौतमलाई तत्काल पार्टीमा ल्याउन नहुने भन्दै असन्तुष्ट पदाधिकारीले पार्टी अध्यक्ष ओलीको ध्यानाकर्षण समेत गराएका छन्। २०५४ सालमा पार्टी विभाजन गरेको र विभिन्न समयमा ओलीलाई साथ नदिएको भन्दै एमालेका ती नेताले गौतमसँग मिल्न नहुने बताएका छन् । वामदेवलाई एमालेमा फर्काउनकोलागि महासचिव शंकर पोखरेल र उपमहासचिव प्रदीप ज्ञवालीले मध्यस्तकर्ताको भूमिका निभाएको बताइएको छ।