विराटनगर – संघीय संसदको सार्वजनिक लेखा समितिका सभापति ऋषिकेश पोखरेलका पूर्वस्वकीय सचिव, ठगी मुद्दाका प्रतिवादी ४३ वर्षीय अनिलकुमार पोखरेल जिल्ला अदालत मोरङका न्यायाधीश चित्रबहादुर गुरुङको इजलासले ५ लाख रूपैयाँ धरौटी बुझाएर छुटेका छन्।

अदालतको आदेशलगत्तै उनी धरौटीबापतको रकम बुझाएर छुटेको जिल्ला अदालत मोरङले बताएको छ। अदालतले अनिलसँग बिहीबार नै बयान लिएपछि वादी नेपाल सरकार र प्रतिवादीतर्फका कानुन व्यवसायीबीच थुनछेक बहस भएको थियो। बहस सकिएपछि अदालतले उनलाई धरौटी लिएर छाड्न आदेश दिएको हो।

अनिलविरुद्ध ३८ लाख ८० हजार रूपैयाँ बिगो मागदाबीसहित मुद्दा दायर भएको थियो। उनी गत पुस २५ गते पक्राउ परेका थिए। प्रहरीले अनुसन्धान टुंग्याएर मंगलबार मिसिल (अनुसन्धान प्रतिवेदन) सरकारी वकिल कार्यालयमा बुझाएको थियो। मिसिलका आधारमा अभियोगपत्र तयार पार्दै वकिल कार्यालयले अनिललाई प्रतिवादी बनाएर बुधबार ठगी मुद्दा दर्ता गरेको हो।

उनले एमबीबीएसमा छोरीको नाम निकालिदिने भन्दै सप्तरीको अग्नीसाईर कृष्णासवरन गाउँपालिका–५ बकधुवाका बौआलाल चौधरीसँग विभिन्न मितिमा ३८ लाख ८० हजार रुपैयाँ लिएको आरोप छ। अनिल नेकपा (एमाले) मोरङका जिल्ला सदस्य हुन्। पार्टीको कोटाबाट छोरीलाई एमबीबीएस भर्ना गरिदिने भन्दै आफूसँग २०७१ देखि २०७३ सालसम्म रकम लिएको बयान बौआलालले दिएका छन्। एबीबीबीएसमा छोरीको नाम ननिस्किएपछि बौआलालले पैसा फिर्ता मागेका थिए।

पैसा फिर्ता माग्दा उल्टै आफूसँग जबरजस्ती ५० लाख रुपैयाँ ऋण लिएको कागज अनिलले बनाएको बौआलालले दिएको बयानमा उल्लेख छ। बौआलालले २ वर्षअघि आफू ठगीमा परेको भन्दै अनिलविरुद्ध प्रहरीमा जाहेरी दिएका थिए।