नेकपा (एकीकृत समाजवादी) का अध्यक्ष तथा पूर्वप्रधानमन्त्री माधवकुमार नेपालले मुलुकको नेतृत्व कम्युनिष्ट पार्टीका नेताले गरे पनि जनतामा सन्तुष्टि नभएको दाबी गरेका छन्।

मंगलवार पिस्कर स्मृति दिवसको अवसरमा आयोजित कार्यक्रममा बोल्दै नेकपा नेता नेपालले यस्तो बताएका हुन्। उनले नेपालको राजनीतिमा पछिल्लो समय धेरै विकृति विसंगतिहरू आएको बताए।

उनले कम्युनिष्ट पार्टी र नेताले मुलुक चलाउने जिम्मेवारी पाएपनि जनतालाई सन्तुष्टि दिनेगरी काम गर्न नसकेको उल्लेख गरे। नेपालले मुलुकको नेतृत्व गर्ने नेतृत्व कम्युनिष्ट नेता भएर मात्रै पनि कम्युनिष्ट आन्दोलन माथि नउठ्ने बताए।

नेपालमा पनि कम्युनिष्ट पार्टीका नेताले राज्य सञ्चालन गरेपनि राम्रो काम गर्न नसकेको उनको आरोप थियो। उनले विश्वका उदाहरण हेर्दा पनि कम्युनिष्ट पार्टीका नेताहरुले नै कम्युनिष्ट पार्टीलाई सिध्याएको इतिहास रहेको बताए।

पूर्वप्रधानमन्त्री नेपालले भने, ‘नेपालमा न्यायको पक्षमा आवाज उठाउने कम्युनिष्ट पार्टीहरु पनि छन्। निमुखाको आवाज बोक्ने पनि छन्। अहिलेको राजनीतिमा धेरै विकृति विसंगतिहरु आएका छन्। मुलुक चलाउने जिम्मेवारी पाएका कम्युनिष्ट पार्टीका मान्छे छन्। तर जनता सन्तुष्ट हुन सकेका छैनन्। कम्युनिष्ट भएर मात्रै पनि हुँदैन। कम्युनिष्ट पार्टीका नेताहरूले नै कम्युनिष्ट पार्टीलाई सिध्याइदिएका छन्।’

अध्यक्ष नेपालले कम्युनिष्टको नाममा गैरकम्युनिष्ट काम कसैले गर्न नहुने धारणा राखे। उनले कम्युनिष्ट भएपछि कम्युनिष्टको नाम र मर्यादा राख्दै विगतको त्याग, तपस्या र बलिदानको कीर्तिमान कायम राख्न सक्नुपर्ने उल्लेख गरे।

उनले कम्युनिष्ट नेताले एक पटक मात्रै कीर्तिमान कायम गरेर नहुने बताए। उनले कम्युनिष्ट पार्टीको नेताले जनताको सेवा,मानव कल्याण र समाज परिवर्तनको लागि लगाउन आवश्यक रहेको बताए।

उनले भने,‘ ‘कम्युनिष्टको नाममा गैर कम्युनिष्ट काम गर्नु हुँदैन। कम्युनिष्टको नाम र मर्यादा राख्नुपर्छ। त्याग, तपस्या र बलिदानको कीर्तिमान कायम राख्नुपर्छ। एक पटक कीर्तिमान कायम गरेर हुँदैन। विगतमा खेलेका भूमिकाको प्रशंसा गर्नुपर्छ।’

उनले जनताको सेवा, मानव कल्याण र समाज परिवर्तनको लागि काम गर्ने भावना सम्प्रेषण गरी युवाहरूलाई असल बाटोमा लैजानसके मात्रै पिस्करका शहीदहरूको सपना पूरा हुने उल्लेख गरे। रासस