विचार मिल्ने पार्टी र समूहहरूसँग एकता गर्न उच्च स्तरीय एकता संवाद समिति बनाउने

आइतबारदेखि सुरु भएको केन्द्रीय समिति बैठकमा राजनीतिक प्रतिवेदन पेस गर्दै नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेपाली कांग्रेस र नेकपा एमालेसँग मिल्नु गल्ति भएको बताउँदै ८४ को निर्वाचनमा एक्लै प्रतिष्पर्धा गर्ने बताएका छन्।

संसदवादी शक्तिबाट लोकतन्त्रमा सुधार गर्न नसकिने उल्लेख गर्दै स्कुलिङ र विचार मिल्ने पार्टी र समूहहरूसँग एकता गर्न उच्च स्तरीय एकता संवाद समिति बनाउने पनि उनले बताएका छन्। ‘अब कांग्रेस–एमालेसँग आगामी चुनावमा कुनै हालतमा मिल्नुहुँदैन। आफ्नै चुनाव चिह्न र आफ्नै शक्तिको बलमा अगाडि बढ्नुपर्छ’, उनले भने।

उनले पुराना दलहरूसँगको सहकार्य जनआन्दोलन, शान्ति प्रक्रिया, संविधान लेखन र यसका कार्यान्वयनका लागि स्वाभाविक र अनिवार्य रहेको भएपनि ती दलसँग मिलेर चुनाव लड्नु गल्ती भएको उनले बताएका छन्।

‘युद्ध र संविधान कार्यान्वयनसम्म आइपुग्दा सहकार्य अनिवार्य थियो,’ प्रतिवेदनमा भनिएको छ, ‘तर, कुनै न कुनै रूपमा विगतमा कांग्रेस–एमालेसँग मिलेर चुनाव लड्नु गल्ती थियो भन्ने कुरा हामीले आत्मसमीक्षा गर्नुपर्छ।’