लमजुङ — लमजुङ सदरमुकाम बेंसीसहरमा आइतबार आयोजित गण्डकी प्रदेशको दोस्रो पञ्चवर्षीय योजना, तहगत सम्बन्ध तथा आयोजना बैंकसम्बन्धी अभिमुखीकरण कार्यक्रमलाई सम्बोधन गर्दै गण्डकी प्रदेशका मुख्यमन्त्री सुरेन्द्रराज पाण्डेले देशको आवश्यकता अनुसार वर्तमान सरकार बनेको र त्यसैले पनि कांग्रेस-एमालेको वर्तमान सरकार कुनै हालतमा नढल्ने दाबी गरेका छन् ।

उनले भने,”कांग्रेस-एमाले सरकार कुनै हालतमा ढल्दैन, भारतले चाहे पनि ढल्दैन। कतिपयले भन्छन्, इन्डियाले चाह्यो भने ढल्छ रे । सबै कुरा इन्डियाले चाहँदैमा कहाँ हुन्छ र ?” यद्यपि यसअघि भारतले चाहेर कहिले सरकार ढलेको थियो भन्ने बारेमा भने उनले केहि बोलेनन्।

मुख्यमन्त्री पाण्डेले संघीय सरकारले पठाउने ५–७ लाखको योजना प्रदेश सरकारले लागू नगर्ने पनि बताएका छन् ।केन्द्रीय सरकारले बजेट कम दिँदा प्रदेश सरकार र स्थानीय सरकारलाई काम गर्न अप्ठ्यारो परेको भन्दै ३० वर्षअघि गर्नुपर्ने काम अहिले गरिरहेको समेत उनले बताएका छन्।