काठमाडौं : नेकपा (एमाले) ले नेपाली जनताको विकास र समृद्धिको आकांक्षा पूरा गर्न बीआरआई महत्वपूर्ण रहेको बताएको छ । नेपाल कम्युनिष्ट पार्टी (एमाले) को केन्द्रीय कमिटीको आठौं बैठकमा प्रस्तुत राजनीतिक प्रतिवेदनमा प्रधानमन्त्री केपी शर्मा ओलीको चीन भ्रमणका क्रममा दुई देशबीच भएको बीआरआई सम्झौताको विशेष महत्व रहेको उल्लेख गरिएको छ ।

नेकपा (एमाले) कुनै पनि सहयोग आयोजनाका विषयलाई आफ्नो विशिष्ट राजनीतिक माग वा भूराजनीतिक स्वार्थका आधारमा अनावश्यक रूपमा राजनीतिकरण र विवादित बनाउनु राष्ट्रिय हितमा नहुने बताएको छ।

हस्ताक्षरित बीआरआई सम्झौताले कनेक्टिभिटी र पूर्वाधार निर्माणमा टेवा पु¥याएर नेपालको भूपरिवेष्ठितताले सिर्जना गरेका कठिनाइहरू हटाउन मद्दत गर्नुका साथै नेपालको पारवहन सुविधालाई विविधीकरण गर्न, व्यापार सहजीकरण गर्न र लगानी बढाउन मद्दत पुग्ने प्रधानमन्त्रीले बताउनुभएको छ । विकास र समृद्धिको जनताको चाहना पूरा गर्न, द्रुत आर्थिक विकासमार्फत विकासशील मुलुकलाई स्तरोन्नति गर्ने, दिगो विकासका लक्ष्यहरू हासिल गर्न र नेपाललाई जतिसक्दो चाँडो मध्यम आय भएको मुलुकमा उचाल्न हामीसँग स्रोतसाधनको अभाव छ र यसलाई छिचोल्दै अगाडी बढ्नुपर्ने आजको आवश्यकता रहेको पनि उनले बताएका छन् ।

एमाले र कांग्रेसले बीआरआईमा साझा अडानमा पुगेर हस्ताक्षर गरेको प्रतिवेदनमार्फत जानकारी दिइएको छ । संवेदनशील विषयमा सत्ता साझेदारीमा विभाजन गरेर फेरि अस्थिरता खेती गर्न खोज्नेहरुको योजना असफल भएको भन्दै बिआरआइ सम्झौता आफैमा महत्वपूर्ण रहेको तर सबै भ्रम र असुविधालाई तोडेर यस विषयमा देशका दुई प्रमुख दलबीच साझा धारणा बनेको एमालेले जनाएको छ । यसले वैदेशिक सम्बन्ध र वैदेशिक सहायता परिचालनमा सिंगो राष्ट्रको एउटै आवाज उठाउन र वार्ताको टेबुलमा राष्ट्रिय अडानलाई बलियो बनाउन सहयोग गरेको राजनीतिक प्रतिवेदनमा भनिएको छ।

प्रधानमन्त्री समेत रहेका एमाले अध्यक्ष ओलीले राष्ट्रिय हितलाई केन्द्रमा राखेर छिमेकीलगायत सबै मित्रराष्ट्रसँग भरपर्दो सम्बन्ध र आर्थिक साझेदारी विकास गर्न चाहेको प्रतिवेदनमा उल्लेख गरेका छन् ।

‘नेकपा (एमाले) देशको वैदेशिक सम्बन्ध सन्तुलित, भरपर्दो, दिगो र पारस्परिक विश्वास र लाभमा आधारित परराष्ट्र नीतिका आधारमा परिचालन गर्न चाहन्छ । कुनै पनि स्वतन्त्र राष्ट्रलाई अरूको आदेश, निर्देशन वा हितका लागि काम गर्न बाध्य पार्नु हुँदैन। हामी स्वतन्त्रताको वास्तविक अभ्यासलाई जोड दिन चाहन्छौं भन्दै, राष्ट्रिय हितलाई केन्द्रमा राखेर छिमेकीलगायत सबै मित्रराष्ट्रसँग विश्वासयोग्य सम्बन्ध र आर्थिक साझेदारी विकास गर्न चाहने ओलीले बताएका छन्। नेपाल आफ्ना मित्रहरूलगायत छिमेकीहरूको जायज हित र चासोप्रति संवेदनशील छ। त्यसैगरी नेपालले आफ्ना छिमेकी र सबै मित्र राष्ट्रहरू नेपालको राष्ट्रिय हित, आफ्नो स्वतन्त्र परराष्ट्र नीति, बाह्य सम्बन्धको आचरण र संवेदनशीलताप्रति संवेदनशील, सहयोगी र सकारात्मक हुन चाहेको पनि उनले बताएका छन्।